जळगावातील गुन्हेगारी थांबण्याचे नाव घेईना…
जळगाव (प्रतिनिधी) : शहरातील शिवाजीनगर परिसरातील के.सी.पार्क परिसरामध्ये अज्ञात आठ ते दहा जणांनी पूर्ववैमनस्यावरून एका व्यक्तीच्या घरावर बेधडक गोळीबार करून दहशत पसरवल्याची धक्कादायक घटना गुरुवार दि. २० जुलै रोजी रात्री साडेआठ वाजेच्या सुमारास घडली आहे. दरम्यान शहर पोलीस स्टेशनचे अधिकार, कर्मचारी घटनास्थळी पोहोचले असून चौकशी करीत आहेत.
काही दिवसांपूर्वी शिवाजी नगरातच लहान मुलांच्या भांडणातून एका गुन्हेगाराने हवेत गोळीबार केल्याची घटना उघड झाली होती. यानंतर पुन्हा शहर पोलीस स्टेशनच्या हद्दीतच के.सी. पार्क परिसरात घटना घडली आहे. शुभम माने हा वाळू व्यावसायिक राहतो. आज रात्री आठ वाजेच्या सुमारास त्यांच्या घरासमोर टोळक्याने धुडगूस घालत त्याला खंडणी मागितली. त्याला वरच्या मजल्यावरून खाली बोलावण्यात आले. मात्र ते समोर न आल्याने टोळक्याने खालूनच एकदा गोळीबार केला. यानंतर यातील काही जणांनी वरच्या मजल्यावर येऊन त्यांच्या दरवाजावर दगडफेक करतांनाच पुन्हा गोळीबार केला. अशा प्रकारे या टोळक्याने दोन-तीन फैरी झाडल्या. यानंतर शुभम माने यांना धमकावत या टोळीने तेथून पलायन केले.
दरम्यान, या घटनेची माहिती मिळताच अपर पोलीस अधिक्षक चंद्रकांत गवळी, उपविभागीय पोलीस अधिकारी संदीप गावित, एलसीबीचे प्रमुख किसनराव नजन पाटील आदींसह शहर पोलीस स्थानकाच्या कर्मचार्यांनी घटनास्थळी धाव घेतली. या टोळक्यामध्ये लखन उर्फ गोलू मराठे, लखन शिंदे, नरेश शिंदे, बंटी बांदल, पवन गाढे, केयूर पंधारे आदींसह अन्य आठ-दहा जणांचा समावेश होता. या संदर्भात त्यांनी शहर पोलीस स्थानकात प्राथमिक तक्रार दिली आहे.
