जळगाव (प्रतिनिधी) – जळगाव शहरातील एका व्यक्तीची बँकेतून बोलत असल्याची बतावणी करून कर्ज मंजूर करून देण्याच्या नावाखाली ऑनलाईन फसवणूक करण्यात आली होती. यातील संशयित आरोपींना अटक करण्यात सायबर पोलीस स्टेशनला यश आले असून फसवणूक झालेल्या रकमेपैकी काही रक्कम प्राप्त करून ती फिर्यादीला जिल्हा पोलीस दलाने परत करण्यात आली.
जळगाव शहरात राहणाऱ्या फिर्यादीला पूजा सुनील चौहान, मुंबई व महेश चौहान, नाशिक या नावाने फोन आले होते. तुम्हाला ऑनलाईन कार व व्यवसायासाठी कर्ज मंजूर करून देण्यासाठी वेगवेगळे कारण देऊन फिर्यादीकडून ऑनलाईन बँकिंग द्वारे पैसे घेतले. एकूण २३ लाख २४ हजार ६९२ ऑनलाईन नेट बँकिंग द्वारे संशयित आरोपींनी फिर्यादीकडून घेतले होते.
याप्रकरणी सायबर पोलीस स्टेशनला गुन्हा दाखल होता. तपास सुरु होता. त्यानुसार मीरा भाईंदर येथे जाऊन तांत्रिक विश्लेषणाच्या आधारे पोलिसांनी तपास करीत संशयित आरोपीना अटक केली आहे. त्यांच्याकडून एकूण २१ लाख ९० हजार रुपये रक्कम हस्तगत करण्यात यश मिळविले आहे. गुन्ह्यातील फिर्यादीला जिल्हा पोलीस दलातर्फे पोलीस अधीक्षक एम. राजकुमार यांचे हस्ते मुद्देमाल परत देण्यात आला आहे.
