जळगाव (प्रतिनिधी) – येथील समस्त ब्राह्मण समाज तथा बहुभाषिक ब्राह्मण संघातर्फे “श्री परशुराम जन्मोत्सव २०२३” अंतर्गत आज रविवार दि. १६ एप्रिल रोजी भव्य दुचाकी रॅली काढण्यात आली. रॅलीत महिला-पुरुषांनी पारंपरिक वेशभूषेत सहभागी होत शहरात श्री परशुराम जन्मोत्सवानिमित्त वातावरण निर्मिती केली. दरम्यान, सकाळी घेण्यात आलेल्या रक्तदान शिबिरात ५५ समाजबांधवांनी रक्तदान केले.
दरवर्षीप्रमाणे यंदाही बहुभाषिक ब्राह्मण संघ श्री परशुराम जन्मोत्सव २०२३ साजरा करीत आहे. जन्मोत्सवामध्ये विविध कार्यक्रमांचे आयोजन करण्यात आले आहे. रविवारी १६ एप्रिल रोजी संध्याकाळी भव्य दुचाकी रॅली काढण्यात आली. महाबळ परिसरात छत्रपती संभाजी चौकात मान्यवरांच्या हस्ते श्रीफळ वाढवून रॅलीला प्रारंभ करण्यात आला. प्रसंगी ढोलताशांच्या गजरात भगवान परशुराम यांचा जयघोष करीत जल्लोष करण्यात आला. रॅलीत अग्रभागी फुलांनी सजविलेल्या जीपमध्ये भगवान परशुराम यांची प्रतिमा ठेवण्यात आली होती. प्रसंगी महिला-पुरुषांनी पारंपरिक वेशभूषा करीत आकर्षक फेटे घालून लक्ष वेधून घेतले. दुचाकी रॅलीत समाजबांधवांनी भगवे ध्वज फडकवित उत्साह दाखविला.
रॅली महाबळ कॉलनी चौक, सागर पार्क परिसर, आकाशवाणी चौक, रिंग रोड, शिवतीर्थ चौक, नेहरू चौक, टॉवर चौक, चौबे विद्यालय, नेताजी सुभाष बाबू चौक, बेंडाळे चौक, नेरी नाका या मार्गाने निघाली होती. मार्गात ठिकठिकाणी स्वागत करण्यात येत होते. मुख्य चौकात थंड पाणी, सरबत वाटप करण्यात आले. तसेच फटाक्यांच्या आतिषबाजीतहि रॅलीचे स्वागत झाले. अखेर पांजरापोळ गोशाळा येथे रॅलीचा समारोप झाला.
प्रसंगी प्रमुख पाहुणे म्हणून सुरेंद्रनाथ मिश्रा, मिलिंद थत्ते, वास्तुविशारद नितीन पारगावकर, देवेंद्र भालेराव उपस्थित होते. त्यांनी समाजाला मार्गदर्शन करून भगवान परशुराम यांच्या कार्याविषयी सांगितले. रॅलीसाठी बहुभाषिक ब्राह्मण संघाचे अध्यक्ष डॉ. अजित नांदेडकर यांच्यासह पदाधिकारी, समाजबांधवांनी परिश्रम घेतले.
रक्तदान शिबीरात ५५ जणांचे रक्तदान
समाजातर्फे रविवारी सकाळी भव्य रक्तदान शिबिराचे आयोजन करण्यात आले होते. शिबिर आकाशवाणी चौकातील दिवंगत बलदेव उपाध्याय फाउंडेशन या ठिकाणी घेण्यात आले. मान्यवरांच्या उपस्थितीत शिबिरास प्रारंभ झाला. शिबिरासाठी केशव स्मृती प्रतिष्ठानचे अध्यक्ष भरत अंमळकर, उद्योजक सुशील आसोपा, शासकीय कंत्राटदार सतीश शर्मा यांची प्रमुख उपस्थिती होती. रक्तदान करण्यासाठी समाजबांधवांनी सकाळी मोठा उत्साह दाखविला. इंडियन रेडक्रॉस सोसायटीच्या सहकार्याने हे शिबिर घेण्यात आले. रक्तदान शिबीरात ५५ जणांनी रक्तदान केले.
