चोपडा (प्रतिनिधी) – कुरियर वेळेवर पोचण्यासाठी जेष्ठ नागरिकांची अज्ञात व्यक्तीने चक्क ९८ हजार ६९८ रुपयांत ऑनलाईन फसवणूक केल्याचा प्रकार उघडकीस आला आहे. या प्रकरणी चोपडा शहर पोलिस स्टेशनला फसवणुकीसह आयटी कलमानुसार गुन्हा दाखल करण्यात आला.
खंडेराव माधवराव पाटील हे चोपडा येथील रामकुवर नगर भागातील रहिवासी आहेत. त्यांनी आपल्या मुलीसाठी तिरुपती कुरीयर चोपडा येथे मोबाईल पाठवला होता. मुलीला पाठवलेले मोबाईलचे पार्सल त्यांनी ऑनलाइन शोधण्याचा प्रयत्न केला असता त्यांना एक मोबाइल क्रमांक मिळाला. त्या मोबाईल क्रमांकावर त्यांनी संपर्क केला. पलीकडून बोलणा-या अज्ञात व्यक्तीने खंडेराव पाटील यांना एक लिंक पाठवली. त्या लिंकवर क्लिक करुन माहिती भरुन दोन रुपये पाठवण्यास सांगितले. पलीकडून बोलणा-यावर विश्वास ठेवत खंडेराव पाटील यांनी दोन रुपये पाठवले. पाटील यांची सर्व माहिती अर्थात डाटा मिळाल्यानंतर काही वेळाने पाटील यांच्या बँक खात्यातून ९८ हजार ६९८रुपये वर्ग झाले.
दोन दिवसांपूर्वी ५ रुपयांच्या बदल्यात ८० हजार खात्यातून काढून टाकल्याची घटना घडली होती. त्यापाठोपाठ दुसरी घटना घडली आहे. आपली फसवणूक झाल्याचे लक्षात आल्यानंतर या प्रकरणी चोपडा शहर पोलिस स्टेशनला फसवणुकीसह आयटी कलमानुसार गुन्हा दाखल करण्यात आला. या गुन्ह्याचा पुढील तपास सुरु आहे.
