जळगाव (प्रतिनिधी) – तालुक्यातील चिंचोली येथे तीन जणांमध्ये हाणामारी झाल्याने त्यातील दोन जण गंभीर जखमी झाले आहेत. यामध्ये एकावर चॉपरने वार झाल्याने पुन्हा एकदा गुन्हेगारीने डोके वर काढल्याचे दिसून आले आहे.
निलेश दिलीप गडकर (वय २१), विनोद प्रल्हाद गडकर (वय ४२) आणि आणखी अन्य एक यांच्यामध्ये अज्ञात कारणावरून हाणामारी झाली. यामध्ये निलेश गडकर यांच्या डोक्याला मार लागला आहे तर विनोद गडकर यांच्या उजव्या हाताला चॉपरने वार बसला आहे.
दरम्यान तिसऱ्या व्यक्तीचे नाव समजू शकले नाही. हा वाद कोणत्या कारणास्तव झाला याची माहिती मिळाली नाही. पोलीस घटनेची माहिती घेत आहेत. जखमींवर शासकीय वैद्यकीय महाविद्यालय व रुग्णालय जळगाव येथे उपचार सुरू आहेत. वैद्यकीय अधिकारी डॉ. स्वप्नील कळसकर हे त्यांच्यावर उपचार करीत आहेत.
