पाटणा ( वृत्तसंस्था ) – दारुबंदी असलेल्या बिहारमध्ये विधानसभा परिसरात दारुच्या बाटल्या सापडल्याने गदारोळ झाला आहे. बिहार विधानसभा परिसरात दारुच्या मोकळ्या बाटल्या आढलल्यामुळे खळबळ उडाली आहे.
यावरुन राजकारण रंगलं असून माजी उपमुख्यमंत्री आणि आरजेडीचे आमदार तेजस्वी यादव यांनी मुख्यमंत्री नितीश कुमार यांच्या राजीनाम्याची मागणी केली आहे. दारुच्या बाटल्या सापडल्याने मुख्यमंत्र्यांनी आता राजीनामा दिला पाहिजे असं ते म्हणाले आहेत.
विधानसभा परिसरात दारुच्या मोकळ्या बाटल्या मिळाल्याची माहिती मिळताच तेजस्वी यादव घटनास्थळी पोहोचले तेजस्वी यादव यांनी ट्विटरला व्हिडीओ शेअर केला आहे. हे आश्चर्यकारक असून मुख्यमंत्र्यांच्या चेंबरपासून काही पावलांच्या अंतरावर वेगवेगळ्या ब्रॅण्डची दारु उपलब्ध असल्याचं तेजस्वी यादव यांनी म्हटलं आहे.
इतक्या कडक सुरक्षेत सुरु असलेल्या अधिवेशनादरम्यानही विधानसभेत दारु मिळत असेल तर उर्वरित बिहारची फक्त कल्पना करा असं म्हणत तेजस्वी यादव यांनी हे लाजिरवाणं असल्याचं म्हटलं आहे.
तेजस्वी यादव यांनी संपूर्ण राज्यात पूर्णपणे दारुबंदी लागू करावं असं म्हटलं आहे. “हे अत्यंत गंभीर आहे. राज्यभरात दारुच्या बाटल्या सापत आहेत. दारुवर पूर्ण बंदी असली पाहिजे,” असं तेजस्वी यादव म्हणाले आहेत.
नितीश कुमार यांनीदेखील हे गंभीर असल्याचं मान्य करताना चौकशी केली जाईल अशी माहिती दिली. अध्यक्षांनी परवानगी दिली तर आम्ही मुख्य सचिव आणि डीजीपींना याचा तपास करायला सांगू शकतो,” असं नितीश कुमार म्हणाले आहेत.
बिहार विधानसभा हिवाळी अधिवेशनाचा आज दुसरा दिवस आहे. मात्र कामकाज सुरु होण्याआधीच दारुबंदीवरुन राष्ट्रीय जनता दलाचे आमदार भाई वीरेंद्र आणि भाजपाचे आमदार संजय सरावगी यांच्यात वाद झाला. राष्ट्रीय जनता दलाच्या आमदाराने भाजपा आमदाराला शिव्या देण्यास सुरुवात केली.
