जळगाव (प्रतिनिधी) – माजी मंत्री गुलाबराव देवकर यांना घरकुल घोटाळ्यात शिक्षा झालेली असल्याने त्यांना निवडणूक लढऊ देऊ नये अशी मागणी करणारी पवन ठाकूर यांची याचिका सुप्रीम कोर्टाने फेटाळून लावली आहे.
पवन ठाकूर यांनी माजी मंत्री गुलाबराव देवकर यांच्या शिक्षेवरील स्थगिती उठविण्याबाबत याचिका दाखल केली होती. दोन सुनावण्यांनंतर न्यायालयाने ठाकूर यांची याचिका फेटाळून लावल्यामुळे गुलाबराव देवकरांना दिलासा मिळाला आहे.
आता देवकर यांना भविष्यात कोणतीही निवडणूक लढण्याचा मार्ग मोकळा झाल्याची चर्चा आहे. घरकुल घोटाळ्यातील शिक्षेवर गुलाबराव देवकर यांनी स्थगिती मिळवली होती.
माजी मंत्री गुलाबराव देवकर यांनी जिल्हा बँकेच्या निवडणुकीसाठी इतर संस्था मतदारसंघातून उमेदवारी अर्ज दाखल केला महाविकास आघाडीने या निवडणुकीत आधीच बहुमत मिळवले आहे. जिल्हा बँकेच्या चेअरमनपदासाठी गुलाबराव देवकर यांचे नाव निश्चित झाल्याचेही वृत्त आहे.
गुलाबराव देवकर यांच्याकडून ज्येष्ठ वकील मुकुल रोहतगी आणि अॅड. अनिकेत निकम यांनी युक्तिवाद केला. याचिकाकर्ता फक्त जळगावचा आहे म्हणून याचिका गृहीत धरता येणार नाही. शिक्षेचा निवडणुकीशी काहीही संबंध नाही अशा याचिका गृहीत धरण्यात येऊ नये, असा हा युक्तिवाद होता यासाठी सर्वोच्च न्यायालयाचे काही दाखले अॅड. रोहतगी आणि अॅड. निकम यांनी दिले. अशामुळे भविष्यात कुणीही उठसुठ याचिका दाखल करू शकतो, असे न्यायालयाच्या निदर्शनास त्यांनी आणून दिले.
