मुंबई ( प्रतिनिधी ) – आठ दिवसांपासून सुरु असलेला एसटी कर्मचाऱ्यांचा संप चिघळत आहे. एसटी कर्मचाऱ्यांच्या मागण्यांवर तोडगाच निघत नसल्यानं मुंबईत ४ संपकरी महिला कर्मचाऱ्यांनी आत्महत्येचा प्रयत्न केला
आंदोलनकर्त्या महिला कर्मचाऱ्यांनी अंगावर रॉकेल ओतून आत्मदहनाचा प्रयत्न केला. पोलिसांनी या महिलांना वेळीच रोखल्याने पुढचा अनर्थ टळला. एसटी महामंडळाचं राज्य सरकारमध्ये विलिनीकरण करण्याची या आंदोलनकर्त्या कर्मचाऱ्यांची मागणी आहे. आठ दिवसांपासून एसटी कर्मचाऱ्यांचा हा संप सुरू आहे.
कामगारांच्या प्रश्नावर काहीच तोडगा निघत नसल्याने आंदोलनकर्त्यांची उद्विग्नता वाढत आहे. एसटी संपाचा आज आठवा दिवस आहे. आठ दिवसांपासून कर्मचारी संघटना आणि शिष्टमंडळाच्या परिवहन मंत्र्यांशी चर्चेच्या फेऱ्या सुरू आहेत. मात्र अद्याप काहीही तोडगा निघालेला नाही. त्यामुळे कर्मचारी आंदोलनावर ठाम आहेत.
