जळगाव ( प्रतिनिधी )- आ. नितेश राणे व खा. निलेश राणे यांच्यावर गुन्हा दाखल करावा या मागणीसाठी आज शहर आणि जिल्हा शिवसेनेतर्फे पोलिसांना निवेदन देण्यात आले.
भाजपचे पदाधिकारी आ. नितेश राणे व खा. निलेश राणे हे सातत्याने युवासेना प्रमुख आदित्य ठाकरे व जिल्ह्याचे पालकमंत्री गुलाबराव पाटील यांच्या बाबतीत सोशल मीडियातून नेहमी अर्वाच्य व शिवराळ भाषेचा वापर करून त्यांच्यावर टीका करत असतात. त्यामुळे सायबर क्राईम कायद्यान्वये त्यांच्यावर कडक कारवाई करण्यात येऊन त्वरित त्यांच्यावर गुन्हे दाखल करण्यात यावे. त्यांचे फेसबुक, इंस्टाग्राम, ट्विटर, व्हाट्सअप अशी सामाजिक माध्यमे बंद करण्यात यावी अशी मागणी जळगाव शिवसेना महानगर व शिवसेना महिला आघाडीतर्फे शहर पोलीस स्थानकात निवेदन देऊन करण्यात आली आहे. त्यांच्यावर कारवाई न केल्यास कायदा व सुव्यवस्थेचा प्रश्न निर्माण होईल असे देखील निवेदनात सांगण्यात आले आहे.
