मुंबई (प्रतिनिधी ) – रिलायन्स विमा कंपनीने 10 जिल्ह्यातील शेतकऱ्यांकडून विमा रक्कम घेतली आहे. कंपनीला 3 लाख 44 हजार 559 शेतकऱ्यांनी पूर्वसुचना दिल्या आहेत. कंपनीच्या प्रतिनीधींनीच पंचनामे करुन अहवाल दिला आहे. परभणी, वर्धा, नागपूर, जालना, गोंदिया, कोल्हापूर, वाशिम, बुलढाणा, सांगली आणि नंदुरबार जिल्ह्यातील शेतकऱ्यांना 263 कोटींची भरपाई अदा करणे आवश्यक होते पण संपली तरी ही भरपाई मिळालेली नाही
दोन दिवसांपासून शेतकऱ्यांच्या खात्यावर भरपाईची रक्कम जमा होण्यास सुरवातही झाली आहे. मात्र या कंपनीने शेतकऱ्यांनाच नाही तर कृषी विभागाला देखील जेरीस आणले आहे. 10 जिल्ह्यातील एकाही शेतकऱ्याला या विमा कंपनीने एका नया पैसादेखील अद्याप अदा केलेला नाही.
केंद्र सरकारने नेमून दिलेल्या इतर विमा कंपन्यांनी नुकसानभरपाईची रक्कम अदा करुन उद्दीष्टपूर्ती देखील केली आहे. मात्र, सरकार आणि विमा कंपन्यामधील वाद शेतकऱ्यांसाठी त्रासदायक ठरत आहे. सर्व प्रक्रिया पूर्ण होऊन आता अडवणूक केली जात आहे. त्यामुळे दिवाळीपूर्वी पैसे शेतकऱ्यांना मिळावेत या सरकरच्या उद्देशाला या कंपनीने असमर्थता दर्शवली आहे.
गतवर्षीच्या खरीप हंगामातील 30 विमा हिस्स्याची रक्कम सरकारकडून रिलायन्स कंपनीला मिळालेली नाही. त्यामुळे ती रक्कम मिळाल्याशिवाय यंदाच्या विम्याची रक्कम शेतकऱ्यांच्या खात्यावर जमा करता येणार नसल्याचे सांगण्यात आले आहे.
यंदाच्या भरपाईच्या अनुशंगाने राज्य आणि केंद्र सरकारने त्यांच्या हिस्स्याची रक्कम कंपनीकडे वर्ग केलेली आहे. असे असतानाही रक्कम शेतकऱ्यांना दिली जात नसल्याने अखेर राज्य कृषी विभागाने केंद्रीय सचिवाकडे लेखी तक्रार केलेली आहे.
विमा कंपनी आणि सरकारमधील वादामध्ये शेतकऱ्यांचे मरण होत आहे. सरकारने घालून दिलेल्या कोणत्याही नियमाचे पालन रिलायन्स कंपनीकडून केले जात नाही. प्रत्येक तालुक्याच्या ठिकाणी विमा कंपनीचे कार्यालय असणे बंधनकारक आहे. मात्र, या कंपनीचे कार्यालये तर नाहीतच शिवाय विमा प्रतिनिधी नियमित नसल्याचे कृषी विभागाकडून सांगण्यात आलेले आहे.
