पाचोरा ( प्रतिनिधी )- मजुरांना ऊसतोडीसाठी घेऊन जात असलेला आयशर बंद डंपरवर जाऊन धडकल्याने दोन मजूर जागीच ठार तर ६ जण गंभीर जखमी झाल्याची धक्कादायक घटना आज धानोरा ते भराडी मार्गावर घडली पोलीसांनी चालकाला अटक केली आहे.
लाख (तांडा), वरसाडे (तांडा), मोहाडी, हनुमानवाडी येथील २४ ते २५ ऊसतोड मजूर फलटन येथील निरा – भिमा सहकारी साखर कारखान्यासाठी शुक्रवारी पहाटे आयशरने निघाले. सकाळी ५:३० वाजेच्या दरम्यान आयशर सिल्लोड तालुक्यातील भराडी गावाजवळील धानोरा फाट्यावर पोहचला. समोर रोडच्या कडेला बंद डम्पर उभा होता. आयशर त्यावर जाहून धडकल्याने झालेल्या अपघातात कॅबिनमध्ये बसलेली कल्पना यमजी पवार (वय – २७ , रा. मोहाडी) व प्रशांत विठ्ठल वाघ (वय – ३० , रा. हनुमानवाडी ) हे जागेवरच ठार झाले. गाडीत बसलेले निलेश यमजी पवार (रा. मोहाडी ), अनिल तंवर (रा. कुऱ्हाड तांडा ), दादाभाऊ राठोड (रा. वरसाडे ), मोहन भिल (रा. लाख (तांडा), रुखमाबाई पवार (रा. वरसाडे ), दादाभाऊ पवार (रा. वरसाडे ) हे सहा जण गंभीर जखमी झाले. या जखमींवर सिल्लोड येथील उपजिल्हा रुग्णालयात उपचार सुरू आहे.
मयतांचे शवविच्छेदन सिल्लोड येथील उपजिल्हा रुग्णालयात करण्यात आले. मयत कल्पना पवार यांचे पश्चात पती, दोन मुले, एक मुलगी असा परिवार आहे.
मयतांच्या नातेवाईकांना १० लाख रुपये नुकसान भरपाई मिळावी अशी मागणी मोहाडी येथील माजी सरपंच भिवा जाधव यांनी निरा – भिमा सहकारी साखर कारखान्याकडे केली आहे. या घटनेमुळे मोहाडी व हनुमानवाडी गावावर शोककळा पसरली आहे.
