चंदीगड ( वृत्तसंस्था ) – रणजीत सिंह हत्याकंदाच्या खटल्यात आज पंचकुलामधील विशेष सीबीआय न्यायालय डेरा प्रमुख गुरमीत राम रहीम सिंगसह पाच आरोपींना शिक्षा देईल. सिरसा येथील पोलीस सतर्क आहेत. डेरा सच्चा सौदाकडे जाणारे सर्व रस्ते ब्लॉक करण्यात आले आहेत.निमलष्करी दलांनाही दक्ष ठेवण्यात आले आहे.
न्यायालयाने ज्या कलमांखाली आरोपींना दोषी ठरवले आहे, त्यामध्ये जन्मठेप आणि फाशीची तरतूद आहे. डेरामुखी गुरमीत राम रहीम सिंह आणि कृष्ण कुमार यांना आयपीसी कलम 302 आणि 120 बी अंतर्गत दोषी ठरवण्यात आलं आहे. आयपीसीच्या कलम 302 अन्वये, आजीवन कारावास आणि 120-बी कमीतकमी सात वर्षे आणि जन्मठेपेची शिक्षा होऊ शकते.
सीबीआयच्या विशेष न्यायालयात न्या डॉ.सुशील कुमार गर्ग यांनी अडीच तासांच्या चर्चेनंतर आरोपीला दोषी ठरवलं होतं. यापूर्वीच गुरमीत राम रहीमला साध्वींच्या लैंगिक शोषणाच्या गुन्ह्यात 20 वर्षांची शिक्षा झाली आहे. पत्रकार रामचंद्र छत्रपती हत्याकांडाच्या खटल्यातही तो जन्मठेपेची शिक्षा भोगत आहे.
कुरुक्षेत्रातील रहिवाशी आणि डेराच्या उच्चस्तरीय व्यवस्थापन समितीचा सदस्य रणजीत सिंह याची 10 जुलै 2002 रोजी गोळ्या घालून हत्या करण्यात आली होती. या खटल्यात गुरमीत राम रहीम, डेराचा तत्कालीन व्यवस्थापक कृष्ण लाल, अवतार, जसबीर आणि सबदील यांना पंचकुला येथील हरियाणा विशेष सीबीआय न्यायालयाने 8 ऑक्टोबर रोजी दोषी ठरवलं होतं. मारेकऱ्यांमध्ये पंजाब पोलिस कमांडो सबदील सिंग, अवतार सिंग, इंदरसेन आणि कृष्णलाल यांचा समावेश होता. रणजीत सिंहची हत्या केल्यानंतर मारेकऱ्यांनी वापरलेली शस्त्रे डेराच्या आश्रमात लपवली होती.
