पाचोरा (प्रतिनिधी) – ऊस तोड मजूर ट्रॅक्टरवर बसून जात असतांना खराब रस्त्यामुळे ट्रॅक्टरवरुन खाली पडताच समोरुन येणाऱ्या वाहनाने त्याला चिरडले. हा मजूर मुळचा पाचोरा तालुक्यातील नेरी येथील असल्याचे सांगण्यात आले.
पाचोरा तालुक्यातील नेरी येथील दोन कामगार ट्रॅक्टर आणि साहीत्य घेऊन मध्यप्रदेश येथील साखर कारखान्याकडे उसतोडीला जात असताना बिल्दी धरणाच्या पुढे अचानक ट्रॅक्टरवरुन लुकमानखा उस्मानखा शेख (५०) हा पडताच समोरून येणाऱ्या अज्ञात वाहनाने चिरडल्याने तो जागीच ठार झाला. ही घटना काल रात्री साडेदहा वाजेच्या सुमारास घडली. घटनास्थळी नेरी येथील बंटी भोईसह छोटु पठाण हे पोहचल्यावर त्यांनी कॉंग्रेस तालुकाध्यक्ष सचिन सोमवंशी यांना मदतीसाठी फोन करून मदत मिळवली . मयताचा मुलगा बबलु शेख ट्रॅक्टर चालवत होता. अर्ध्यावरच प्रवास सोडून दोन्ही ट्रॅक्टर पाचोरा येथे आणण्यात आले मयताचा मृतदेह शवविच्छेदनासाठी पाचोरा ग्रामीण रुग्णालयात आणला . या घटनेची माहिती मिळताच नेरी गावावर शोककळा पसरली.
