जळगाव ( प्रतिनिधी ) – आश्रमशाळेतील शिक्षक आणि शिक्षकेतर कर्मचारी उपेक्षित घटकांना ज्ञानदान करतात. अडचणींवर मात करून आपले कर्तव्य बजावतात. आजवर त्यांच्या प्रयत्नांना कुणी कौतुकाची थाप दिली नव्हती. यामुळे स्वाभीमानी शिक्षक व शिक्षकेतर कर्मचार्यांच्या संघटनेचा हा उपक्रम कौतुकास्पद आहे. पुरस्कार हे बळ असते. आश्रमशाळेच्या शिक्षकांनी शिक्षणाचा दर्जा उंचावण्यासाठी प्रयत्नशील रहावे असे आवाहन करतांनाच आपण त्यांच्या वरिष्ठ वेतन श्रेणीसह अन्य समस्या सोडविण्यासाठी पाठपुरावा करणार असल्याची ग्वाही पालकमंत्री ना. गुलाबराव पाटील यांनी दिली. ते चिंचपुरा येथे आदर्श शिक्षक-शिक्षकेतर कर्मचारी आणि कोरोनायोध्दा पुरस्कार वितरण सोहळ्यात बोलत होते.
राज्य शासनाच्या सेवेतील शिक्षकांना आदर्श शिक्षक पुरस्काराने गौरविण्यात येते. आश्रमशाळेतील शिक्षकांना याप्रकारे सन्मानीत करण्यात येत नाही. स्वाभीमानी शिक्षक व शिक्षकेतर कर्मचार्यांच्या संघटनेचे जिल्हाध्यक्ष संभाजी पाटील यांनी चिंचपुरा येथे आज आश्रमशाळेतील शिक्षक आणि शिक्षकेतर कर्मचार्यांच्या सत्कार सोहळ्याचे आयोजन केले. याच कार्यक्रमात कोरोना काळात खावटी योजनेच्या अंमलबजावणीसाठी सेवा बजावणार्या कर्मचार्यांना कोरोना योध्दा म्हणून सन्मानीत करण्यात आले.
या कार्यक्रमाच्या अध्यक्षस्थानी पालकमंत्री ना. गुलाबराव पाटील तर प्रमुख पाहुणे म्हणून आ. सुधीर तांबे, स्वाभीमानी शिक्षक – शिक्षकेतर कर्मचारी संघटनेचे अध्यक्ष भरत पटेल, सरस्वती विद्या प्रसारक मंडळाचे अध्यक्ष शिवाजीराव पाटील, युवक कॉंग्रेसचे जिल्हाध्यक्ष हितेश पाटील , भुपेंद्र पाटील , टी. पी. पाटील, अशोक पाटील या मान्यवरांची उपस्थिती होती.
माध्यमिक मुख्याध्यापक वर्गवारीतून कर्जाणे (ता. चोपडा ) येथील शरदचंद्रीकाआक्का पाटील आश्रमशाळेचे मुख्याध्यापक शरद मोरे; प्राथमिक मुख्याध्यापक वर्गवारीत सत्रासेन ( ता. चोपडा) येथील धनाजीनाना आश्रमशाळेचे जगदीश महाजन; प्राथमिक शिक्षक वर्गवारीत-मनवेल (ता. यावल) येथील तांबट आश्रमशाळा येथील राकेश महाजन; माध्यमिक शिक्षक वर्गवारीत कर्जाणे (ता. चोपडा) येथील शरदचंद्रीका आक्का पाटील आश्रमशाळेचे दिलीप सावकारे; उच्च माध्यमिक शिक्षक वर्गवारीत मेहुणबारे आश्रमशाळेचे उदयभान महाजन; क्रीडा शिक्षक वर्गवारीत-गुढे (ता. भडगाव) येथील बहिणाबाई महाजन आश्रमशाळेचे शिवाजी महाजन आणि तंत्रस्नेही शिक्षक सत्रासेन (ता. चोपडा) येथील आश्रमशाळेचे महेशकुमार शिंदे यांना आदर्श शिक्षक पुरस्काराने पालकमंत्री गुलाबराव पाटील व मान्यवरांच्या हस्ते गौरवण्यात आले.
शिक्षकेतर कर्मचार्यांमध्ये अधिक्षक या वर्गवारीत मोहगन (ता. रावेर) येथील शशिकांत भालेराव; महिला अधिक्षीका डोमगाव (ता. जळगाव) येथील रूपाली पाटील; कनिष्ठ लिपीक तरडी (ता. पारोळा) येथील आश्रमशाळेचे भगवान पाटील; प्रयोगशाळा परिचर या वर्गवारीत-सत्रासेन (ता. चोपडा) येथील आश्रमशाळेचे सुकलाल पाटील; शिपाई या वर्गवारीत सत्रासेन येथील नरेंद्र महाजन; स्वयंपाकी या वर्गवारीत सतखेडा (ता. धरणगाव) येथील कांतीलाल पाटील; कामाठी या वर्गवारीत सातगाव डोंगरी (ता. पाचोरा ) येथील सखाराम चव्हाण; मदतनीस या वर्गवारीत हातेड बुद्रुक (ता. चोपडा) येथील गोपाल पाटील आणि पहारेकरी या वर्गवारीत अंतुर्ली (ता. अमळनेर) येथील प्रवीण पाटील यांना सन्मानीत करण्यात आले.
याप्रसंगी ना. गुलाबराव पाटील यांनी हाच सोहळा शासकीय पातळीवरून आयोजीत करण्यासाठी आपण पाठपुरावा करणार असल्याची माहिती दिली प्रास्ताविक संभाजी पाटील यांनी तर सूत्रसंचालन टी.पी. पाटील यांनी केले. आभार भूपेंद्र पाटील यांनी मानले.
