जळगाव ( प्रतिनिधी ) — कांचन नगर येथे राहणाऱ्या तरूणावर चार हल्लेखोरांनी गोळीबार करून तरूणाला जखमी केले होते. या घटनेत हल्लेखोर एक तरूण देखील जखमी झाला या गुन्ह्यातील तीन संशयित आरोपींना शनीपेठ पोलीसांनी अटक केली आहे. अशी माहिती पोलीस अधिक्षक डॉ. प्रविण मुंढे यांनी दिली
कांचननगर परिसरात आकाश सपकाळे कुटुंबियांसह राहतो. आज सकाळी चार हल्लेखोर दुचाकीने आकाशच्या घरासमोर आले. आकाश घरात झोपलेला असतांना चार जणांपैकी दोन जणांनी घरात घुसून आकाशवर गोळीबार केला. आकाशच्या उजव्या हाताच्या करंगळीला जखम झाली. विकी उर्फ मयूर अलोने, सोनू सपकाळे, बापू सपकाळे व एक अज्ञात व्यक्ती या चार जणांनी हा हल्ला केल्याचे आकाश सपकाळे यांनी सांगिेतले. विकी अलोने याने गोळीबार केल्यानंतर आकाशचा भाऊ सागर याने संशयित आरोपी विकी अलोनेला पकडले. दोघांमध्ये झटापट झाली. या झटापटीत संशयित विकी दरवाजाच्या पायरीवरून खाली पडल्याने त्यांच्या डोक्याला गंभीर दुखपत झाल्याने तो बेशुध्द पडला. त्यांच्या हातातील गावठी पिस्तूल, मोबाईल, रूमाल आणि राऊंड खाली पडले.
आज झालेला गोळीबार हा पुर्ववैमनस्यातून झाल्याची माहिती समोर आली आहे. जखमी आकाश सपकाळे आणि जखमी आरोपी विकी अलोने या दोघांना जिल्हा शासकीय वैद्यकीय महाविद्यालयात दाखल करण्यात आले. विकी उर्फ मयूर अलोने, सोनू सपकाळे, बापू सपकाळे यांना शनीपेठ पोलीसांनी अटक केली आहे. अशी माहिती जिल्हा पोलीस अधिक्षक डॉ प्रविण मुंढे यांनी दिली.
