जळगाव ( प्रतिनिधी ) —कोरोनाला आळा घालण्यासाठी भवरलाल अँड कांताबाई जैन फाउंडेशन व युवाशक्ती फाउंडेशन यांच्या संयुक्त विद्यमाने काव्यरत्नावली चौक येथे १९ सप्टेंबररोजी सकाळी ६ ते सायंकाळी ७ वाजेपर्यंत घरगुती गणेश मूर्ती व निर्माल्य संकलन केंद्र उभारण्यात येणार आहे.
तेथे विसर्जन आरती करण्यासाठी व्यवस्था करण्यात येणार आहे. युवाशक्तीचे ५० स्वयंसेवक, रामानंद नगर पोलीस स्टेशनचे १५ पोलीस , वाहतूक पोलीस शाखेचे ३ कर्मचारी, पूजा विधी करण्यासाठी १ ब्राह्मण, निर्माल्य संकलन करण्यासाठी महानगरपालिकेचे ५ स्वच्छता दूत, ५ सजविलेले ट्रक, प्रसाद इत्यादी व्यवस्था करण्यात येणार आहे.
मागील वर्षी सुद्धा उपरोक्त संस्थेतर्फ़े याच प्रकारे उपक्रम काव्यरत्नावली चौकात राबविण्यात आला होता, शहरातील २५०० वर घरगुती गणेश मूर्ती संकलित करून, मेहरूण तलावात विधीवत विसर्जन करण्यात आले होते. यावर्षी सुद्धा घरगुती मुर्तीं संकलन करून विधिवत विसर्जन करण्यात येणार आहे.
या उपक्रमाला जिल्हाधिकारी कार्यालय, जिल्हा पोलीस दल, महानगर पालिका, सार्वजनिक गणेशउत्सव महामंडळ यांचे सहकार्य लाभणार आहे.
जिल्हाधिकारी अभिजित राऊत, अप्पर पोलीस अधीक्षक चंद्रकांत गवळी, महापौर जयश्री महाजन , पोलीस निरीक्षक विजय शिंदे आदी मान्यवर या केंद्रावर घरगुती मूर्ती विसर्जनासाठी अर्पण करणार आहेत.
जास्तीत जास्त नागरिकांनी घरगुती मूर्ती अर्पण करावी असे आवाहन आयोजकांनी केले आहे.
