जळगाव;-जगात सर्वत्र कोरोनाचा हाहाकार असतांना या कठीण परिस्थितीत पती आणि पत्नीला दोघांनाही कोरोना झाल्यानंतर त्या कुटुंबाची अवस्था काय असेल हे शब्दात वर्णन करणे अशक्य असले तरी पती क्वारंटाईन आणि पत्नी अत्यावस्थेत रुग्णालयात उपचार घेऊन सुखरूप बरी झाल्याने पतीसह कुटुंबातील व्यक्तींचा आनंद हा गगनात मावेनासारखा झाला . पतीनेही कोरोनावर मात करणाऱ्या सौभाग्यवतीचे औक्षण करून स्वागत केल्याचे दुर्मिळ चित्र शहरातील पिंप्राळा परिसरातील सोनी नगर येथे पाहायला मिळाले असून यामुळे अनेकांना कोरोनावर मात करण्याचे बळ आपसूकच मिळाले नाही तर नवलचं! येथील कराटे ,नृत्य प्रशिक्षक आणि पत्रकार असलेलले नरेश बागडे यांनी असाच आदर्श इतरांसमोर ठेवला आहे.
नरेश बागडे आणि त्यांची पत्नी राधिका यांना काही दिवसांपूर्वी कोरोनाची बाधा झाली होती. यात पत्नीची प्रकृती बिघडल्यामुळे त्यांना इकरा कोविड केअर सेंटरमध्ये दाखल करण्यात आले. तेथे त्यांना ऑक्सीजन बेडवर उपचार करण्यात आले. काही दिवसांच्या उपचारानंतर सौ. राधिका शनिवारी दुपारी आपल्या घरी परतल्या. यावेळी घरीच होम क्वारंटाईन असलेले त्यांचे पती नरेश बागडे यांनी आपल्या सौभाग्यवतीचे औक्षण करून स्वागत केले.औक्षण केवळ स्त्रियाच करतात हा पायंडा त्यांनी मोडून काढत आपल्या गृहलक्ष्मीचे स्वागत अशा प्रकारे करून समाजासमोर नवा आदर्श निर्माण केला आहे.
याबाबत नरेश बागडे यांच्याशी संपर्क साधला असता, ते म्हणाले की, इकरा कोविड केअर सेंटरमध्ये माझ्या पत्नीवर चांगले उपचार झाल्याने आज ती घरी आली आहे. हा अतिशय आनंदाचा प्रसंग असून यामुळे मी माझ्या पत्नीचे औक्षण करून स्वागत केले. या माध्यमातून आपण डॉक्टर्ससह अन्य मित्रमंडळी आणि अडचणीत मदत करणार्यांबाबतही कृतज्ञता व्यक्त केलीच आहे. तर सौभाग्यवती सुखरूप परतल्याने तिचे औक्षण करून स्वागत करण्याची भावना मनात आल्याचे नरेश बागडे यांनी सांगितले.
