श्रीरामपूर (वृत्तसंस्था) – श्रीरामपूर पोलिसांनी शहरात छापा टाकून बोलेरो वाहनांसह 46 किलो गांजा जप्त केला. आज बुधवारी सकाळी ही कारवाई करण्यात आली. या प्रकरणी पोलिसांनी गणेश भास्कर सरोदे (वय 38 वर्ष, रा. देवकर वस्ती, वार्ड नंबर 7, श्रीरामपूर) यास अटक केली आहे.
श्रीरामपूर पोलिसांना मिळालेल्या गुप्त माहिती वरुन देवकर वस्ती येथे एक इसम गांजा विक्री करण्याकरिता आला आहे. या बाबतची खात्री होताच पोलिसांनी तेथे जाऊन छापा टाकला असता 4 लाख 60 हजार रुपये किमतीचा 46 किलो गांजा व 4 लाख रुपये किमतीची एक महिंद्रा बोलेरो पिकप असा एकूण 8 लाख 60हजार रुपयांचा मुद्देमाल जप्त केला. आरोपी गणेश भास्कर सरोदे याला पकडले असून श्रीरामपूर शहर पोलीस स्टेशन गुन्हा दाखल करण्यात आला.
पोलीस अधीक्षक मनोज पाटील, अपर पोलीस अधीक्षक डॉ. दिपाली काळे, यांचे मार्गदर्शनाखाली पोलिस उप अधीक्षक संदीप मिटके, पोलीस निरीक्षक संजय सानप,सहा. पोलिस निरीक्षक संभाजी पाटील, हेड कॉन्स्टेबल जोसेफ साळवी, पोना करमल, पंकज गोसावी, राहुल नरवडे, किशोर जाधव,सुनील दिघे आदींनी ही कारवाई केली.
