मुंबई (वृत्तसंस्था) –चित्रपटाच्या प्रमोशसाठी कलाकारांकडून वेगवेगळे फंडे वापरले जात आहे. काही दिवसांपूर्वी पुण्यातील रस्त्यांवर गल्लोगल्लीत, आणि चौकाचौकात लागलेल्या एका होर्डिंगनं नागरिक पुरते गोंधळून गेले होते. सगळीकडंच ‘सविता भाभी… तू इथंच थांब!!!’ असे होर्डिंग लावलेले होते. आता कलाकारांनी चित्रपटाच्या प्रमोशनसाठी नवा फंडा वापरला आहे. प्रमोशनसाठी चित्रपटातील कलाकार मंडळी थेट रस्त्यावर उतरल्याचं पाहायला मिळत आहे. मराठी चित्रपटासाठी मृण्मयी देशपांडे, सुव्रत जोशी, सायली संजीव फलक झळकावत रस्त्यावर उतरल्याचं पाहायला मिळालं. मुंबईत विलेपार्ले आणि अंधेरी येथे तसेच पुणे येथील गुडलक हॉटेलजवळ, डेक्कन जिमखाना येथे अभिनेत्री व दिग्दर्शिका मृण्मयी देशपांडे, सुव्रत जोशी, सायली संजीव या कलाकारांनी हातात फलक घेऊन रस्त्यावर उतरले. त्यांनी रसिकांना चित्रपटगृहाकडे यायचे आवाहन केले. मराठी कलाकारांना असं रस्त्यावर उतरुन प्रमोशन करताना पाहून सर्वांच्याच भुवया उंचावल्या. त्यांच्या हातात अत्यंत कल्पक व लक्ष वेधून घेणारे फलक होते. ‘आमच्या सिनेमाच्या प्रमोशनसाठी आम्ही तुमच्याकडे आलोय, तुम्ही थिएटरमध्ये तरी या…’, ‘आमचा सिनेमा तुम्ही आई-बाबा, मित्र-मैत्रिणी, प्रियकर-प्रेयसी ते अगदी तुमच्या ‘एक्स’सोबतही पाहू शकता’, ‘मराठी लोकांनी थिएटरमध्ये जाऊन सिनेमा पाहिलाच नाही तर मराठी सिनेमा चालणार कसा?’, असे फलक घेऊन हे कलाकार हमरस्त्यात उभे होते. रस्त्यावरुन जाताना लोकही त्यांच्याकडे कुतूहलाने पाहत होते. चित्रपटासाठी येण्याचे आश्वासनही या कलाकारांना देत होते. मृण्मयी देशपांडे दिग्दर्शित आणि सुव्रत जोशी, सायली संजीव, अंजली पाटील आणि अंकित मोहन यांच्या प्रमुख भूमिका असलेला ‘मन फकिरा’6 मार्चला प्रदर्शित होत आहे. याच चित्रपटाचे प्रमोशन ते करताना दिसले.
