नवी दिल्ली (वृत्तसंस्था) – अमेरिकेत एका भारतीय नर्सची चाकूने भोकसून क्रूर पद्धतीने हत्या करण्यात आली आहे. मारेकरी एवढ्यावरच थांबला नाही तर, त्याने तिला कारखाली चिरडून तो पसार झाला. घरगुती वादातून ही हत्या झाल्याचा संशय व्यक्त करण्यात येत असून, पोलिसांनी याप्रकरणी तिच्या पतीला अटक केली आहे.
अमेरिकेतील फ्लोरिडा येथील एका रुग्णालयाबाहेर ही घटना घडली आहे. मेरीन जॉय (वय २६) असे या नर्सचं नाव असून, ती मूळची केरळमधील मोनीपल्ली जिल्ह्यातील रहिवाशी आहे. ती फ्लोरिडातील स्प्रिंग्स रुग्णालयात काम करत होती. मंगळवारी ती रुग्णालयातून बाहेर पडत असताना, आरोपीने तिच्यावर चाकूने वार केले. त्यानंतर ती जागेवर कोसळल्यावर, तिच्या अंगावरुन कार नेली, असे प्रत्यक्षदर्शींनी सांगितले.
पोलिसांनी सांगितल्यानुसार, घरगुती वादातून ही हत्या झाली आहे. या प्रकरणी पोलिसांनी तिचा पती फिलिप मॅथ्यू (वय ३४) याला अटक केली आहे. तो वेलियनाड येथील रहिवाशी असून, त्याच्यावर हत्येचा गुन्हा दाखल झाला आहे. मॅथ्यू हा पत्नीची हत्या केल्यानंतर घटनास्थळावरुन पसार झाला होता. रुग्णालयाबाहेर ती जखमी अवस्थेत पडली होती. तेव्हा तेथील काही नागरिकांनी तिला जवळच्या रुग्णालयात दाखल केले होते. पण दाखल करण्या आधीच तिचा मृत्यू झाला.
