
वनविभागाच्या कारभारावर प्रश्नचिन्ह
भडगाव (प्रतिनिधी) : भडगाव शहर आणि संपूर्ण तालुक्यात हिरव्यागार वृक्षांची मोठ्या प्रमाणावर बेकायदेशीर तोड सुरू असल्याची गंभीर बाब समोर आली आहे. पर्यावरण संवर्धन व वृक्षलागवडीसाठी शासनाकडून कोट्यवधींचा निधी खर्च होत असताना, दुसरीकडे डेरेदार झाडांवर सर्रास कुऱ्हाड चालवली जात असल्याने वनविभागाच्या प्रशासकीय कार्यक्षमतेवर आणि भूमिकेवर नागरिकांकडून तीव्र प्रश्नचिन्ह उपस्थित केले जात आहे.


अधिकाऱ्यांची अनुपलब्धता आणि लाकडाचे ढीग
गेल्या काही महिन्यांपासून तालुक्यात वनविभागाचे अधिकारी व कर्मचारी वेळेवर उपलब्ध होत नसल्याची चर्चा आहे. त्यातच भडगाव येथे स्वतंत्र स्थानिक कार्यालय नसल्याने तक्रारींचे तातडीने निवारण व अवैध वृक्षतोडीवर नियंत्रण ठेवण्यात अडचणी येत असल्याचे बोलले जाते. या परिस्थितीचा फायदा घेत शहर व ग्रामीण भागात वृक्षतोड करून लाकडांचे साठे रचले जात आहेत. या लाकडांची तोड व वाहतुकीसाठी सक्षम प्राधिकाऱ्यांची परवानगी आणि आवश्यक कागदपत्रे आहेत का, याची तपासणी होण्याची मागणी होत आहे.
आर्थिक हितसंबंधांचे गंभीर आरोप
या प्रकरणात काही मजुरांनी नाव न सांगण्याच्या अटीवर कथित आर्थिक देवाणघेवाणीबाबत गंभीर दावे केल्याची चर्चा आहे. मोठ्या वाहनांसाठी दहा हजार रुपये तर छोट्या वाहनांसाठी पाच हजार रुपये घेतले जात असल्याचा आरोप काही मजुरांकडून केला जात असल्याचे समजते. या कथित व्यवहारांना अद्याप स्वतंत्र पुष्टी मिळालेली नसली, तरी आरोपांचे गांभीर्य पाहता वरिष्ठ अधिकाऱ्यांनी याची पारदर्शक व निष्पक्ष चौकशी करावी, अशी मागणी जोर धरत आहे.
तालुक्यात उघडपणे वृक्षतोड आणि लाकूड साठवणूक सुरू असताना स्थानिक यंत्रणा काय करते, असा सवाल नागरिक विचारत आहेत. मागील काही महिन्यांत भडगाव तालुक्यात दिलेल्या वृक्षतोड परवानग्या, विनापरवाना तोडीची प्रकरणे, तपासलेली वाहने, जप्त केलेला लाकूडसाठा, गुन्हे दाखल व दंडात्मक कारवाईचा तपशील अधिकृतपणे जाहीर करावा, अशी अपेक्षा व्यक्त होत आहे.
वृक्षतोडीमुळे तापमानवाढ, जमिनीची धूप, बदलते पर्जन्यमान आणि जैवविविधतेवर विपरीत परिणाम होत असून पर्यावरणप्रेमींकडून चिंता व्यक्त केली जात आहे. भडगाव व पाचोरा विभागातील वरिष्ठ वनाधिकाऱ्यांनी विशेष पथक नेमून संशयित ठिकाणांची पाहणी, परवानग्यांची पडताळणी आणि कथित आर्थिक आरोपांची सखोल चौकशी करून दोषींवर कठोर कारवाई करावी, अशी मागणी नागरिक व पर्यावरणप्रेमींकडून होत आहे.









