यावल ( प्रतिनिधी ) : – महर्षी वेदव्यासांच्या पावन वास्तव्याची आख्यायिका लाभलेल्या व्यासनगरी यावल येथे दिवाळी पाडव्याचा उत्सव मोठ्या भक्तिभावाने साजरा करण्यात आला. यानिमित्ताने येथील महर्षी व्यास मंदिरात श्री व्यासोनारायण भगवान यांना ५६ भोगांचा अन्नकूट अर्पण करण्याचा धार्मिक सोहळा भक्तिमय वातावरणात संपन्न झाला.दिवाळी पाडव्याच्या शुभमुहूर्तावर भगवान व्यासोनारायण यांच्यासमोर विविध प्रकारच्या खाद्यपदार्थांचा आकर्षक नैवेद्य सजविण्यात आला होता. ५६ विविध पदार्थांच्या अन्नकूटाचे दर्शन घेण्यासाठी भाविकांनी मंदिरात उपस्थिती लावली. मंदिर परिसरात भक्तिमय वातावरण निर्माण झाले होते.
महर्षी वेदव्यासांचे यावलशी ऐतिहासिक नाते
महर्षी वेदव्यास हे भारतीय संस्कृतीतील आद्यगुरू म्हणून ओळखले जातात. महाभारत, श्रीमद्भागवत, ब्रह्मसूत्र आणि अठरा पुराणांच्या रचनेचे श्रेय त्यांना दिले जाते. यावल येथील महर्षी व्यास मंदिराला विशेष धार्मिक आणि ऐतिहासिक महत्त्व आहे. प्रचलित आख्यायिकेनुसार, महर्षी व्यासांनी यावल परिसरात काही काळ वास्तव्य केले होते. येथील लोमेश ऋषींच्या आश्रमात त्यांच्या हस्ते यज्ञ संपन्न झाल्याची तसेच महाभारतातील काही पर्वांचे लेखन या भूमीत झाल्याची श्रद्धा सांगितली जाते.यावल येथील हे महर्षी व्यास मंदिर देशातील मोजक्या व्यास मंदिरांपैकी एक असून महाराष्ट्रातील विशेष धार्मिक स्थळ म्हणून ओळखले जाते. त्यामुळे व्यासनगरी यावलला धार्मिक परंपरेचा अनमोल वारसा लाभला आहे.दिवाळी पाडव्याच्या मंगलमय पर्वावर पार पडलेल्या ५६ भोग अन्नकूट सोहळ्यामुळे व्यासनगरीतील धार्मिक परंपरेला उजाळा मिळाला. श्रद्धा, भक्ती आणि संस्कृतीचा सुंदर संगम या निमित्ताने अनुभवायला मिळाला.
