मुक्ताईनगर तालुक्यात पाच जणांविरुद्ध गुन्हा
जळगाव (प्रतिनिधी) : शेतीच्या वाटणीवरून सुरू असलेल्या वादाचे रूपांतर हिंसक हाणामारीत झाल्याची घटना मुक्ताईनगर तालुक्यातील भोकरी येथे घडली. शेतीचा हिस्सा देत नसल्याच्या कारणावरून एका तरुणाला पकडून ठेवत त्याच्या डोक्यावर विटांनी मारहाण करण्यात आली, तसेच धारदार शेतीच्या अवजाराने मानेवर वार करून गंभीर जखमी केल्याचा आरोप आहे. या प्रकरणी मुक्ताईनगर पोलीस ठाण्यात पाच जणांविरुद्ध खुनाचा प्रयत्न केल्याचा गुन्हा दाखल करण्यात आला आहे.
या प्रकरणातील फिर्यादी शुभांगी कोळी (वय २२, रा. भोकरटी, ता. मुक्ताईनगर) यांनी तक्रार दिली आहे. त्यांच्या पतीचा शेतीच्या वाटणीवरून संबंधित व्यक्तींशी वाद सुरू आहे. २४ ऑक्टोबर २०२६ रोजी रात्री सुमारे १० वाजेच्या सुमारास हा प्रकार घडल्याची नोंद पोलीसात करण्यात आली आहे. शेतीचा हिस्सा देत नसल्याच्या कारणावरून संबंधितांनी फिर्यादीच्या पतीसोबत वाद घातल्याचा आरोप आहे.
विटांनी मारहाण; धारदार अवजाराने वार केल्याचा आरोप
तक्रारीनुसार, फिर्यादीच्या पतीला काही जणांनी पकडून ठेवले. त्यानंतर विटांनी डोक्यावर मारहाण करण्यात आली. तसेच जिवे मारण्याच्या उद्देशाने धारदार शेतीच्या अवजाराने मानेवर दोन ते तीन वेळा वार केल्याचा आरोप तक्रारीत करण्यात आला आहे. या हल्ल्यात फिर्यादीचे पती गंभीर जखमी झाल्याचे अहवालात नमूद आहे.
पाच जणांविरुद्ध गुन्हा दाखल
या प्रकरणी गजानन कैलास कोळी, योगेश रमेश कोळी, मयूर रमेश कोळी, कैलास श्यामराव कोळी आणि रमेश श्यामराव कोळी यांच्याविरुद्ध गुन्हा दाखल करण्यात आला आहे. मुक्ताईनगर पोलीस ठाण्यात भारतीय न्याय संहितेच्या संबंधित कलमांनुसार गुन्हा नोंदविण्यात आला आहे. या प्रकरणाचा तपास पोलीस उपनिरीक्षक तुषार पाटील करीत आहे.
