पारोळा पोलिस ठाण्यात गुन्हा दाखल; पोक्सो, बालविवाह प्रतिबंधक कायदा आणि भारतीय न्याय संहितेअंतर्गत कारवाई
पारोळा, ( प्रतिनिधी ) : – अल्पवयीन मुलीचा विवाह लावून तिच्यावर लैंगिक अत्याचार केल्याचा गंभीर प्रकार पारोळा तालुक्यातील जिराळी येथे समोर आला आहे. या प्रकरणी पती संतोष सोनवणे, सासू सांगिता सोनवणे आणि सासरे गुलाब भिल यांच्याविरुद्ध पारोळा पोलिस ठाण्यात गुन्हा दाखल करण्यात आला आहे. संबंधित प्रकरणात भारतीय न्याय संहिता २०२३ चे कलम ६४(२)(एम), लैंगिक अपराधांपासून बालकांचे संरक्षण अधिनियम (पोक्सो) २०१२ चे कलम ६ तसेच बालविवाह प्रतिबंधक अधिनियम २००६ चे कलम ९, १० व ११ लावण्यात आले आहेत.
पोलिस नोंदीनुसार, पीडित मुलगी ही १६ वर्षे ९ महिन्यांची असून जळगाव जिल्ह्यातील पारोळा तालुक्यातील जिराळी येथील रहिवासी आहे. तिच्या जबाबावरून ही बाब समोर आली. सुमारे पाच वर्षांपूर्वी तिचा विवाह समाजाच्या जातीरिवाजाप्रमाणे आई-वडिलांच्या संमतीने संतोष सोनवणे याच्याशी झाला होता. त्यानंतर ती पतीसोबत संसार करू लागली. या काळात तिला दोन मुले झाली असल्याचे जबाबात नमूद आहे.
पीडितेच्या म्हणण्यानुसार, ती यापूर्वीही गर्भवती झाली होती. १ सप्टेंबर २०२६ रोजी सायंकाळी सुमारे सहा वाजता तिला पोटात दुखू लागल्याने तिची आजी सोनुबाई बुधा यांनी धुळे येथील शासकीय हिरा मेडिकल कॉलेजमध्ये उपचारासाठी दाखल केले. उपचारादरम्यान तिची नैसर्गिक प्रसूती होऊन एका मुलीचा जन्म झाला.
प्रसूतीनंतर वैद्यकीय महाविद्यालयात उपचार सुरू असताना पीडितेने आपल्या वयाबाबत व पूर्वी झालेल्या विवाहाबाबत माहिती दिल्याचे पोलिस नोंदीत नमूद आहे. आधारकार्डावरील जन्मतारीख खरी आहे की खोटी, याबाबत तिला माहिती नसल्याचेही तिच्या जबाबात नमूद करण्यात आले आहे. या जबाबावरून संबंधित प्रकार बालविवाह, पोक्सो कायदा आणि लैंगिक अपराधाच्या स्वरूपात येत असल्याचे समोर आल्याने पोलिसांनी प्रकरणाची गंभीर दखल घेतली.
या प्रकरणी पोलीस उपनिरीक्षक अमोल दुकळे यांनी शासनातर्फे तक्रारदार होत फिर्याद दिली. त्यावरून पारोळा पोलिस ठाण्यात गुन्हा रजिस्टर क्रमांक ३३५/२०२६ अन्वये गुन्हा दाखल करण्यात आला आहे. आरोपींना अद्याप अटक झालेली नसून पुढील तपास पोलीस उपनिरीक्षक अमोल दुकळे करीत आहेत.
