मोटारसायकलसह ९० हजारांचा मुद्देमाल जप्त
जळगाव (प्रतिनिधी) : शहरातील एमआयडीसी पोलिस ठाण्याच्या हद्दीतील डोर बाजार परिसरातील ‘मातोश्री’ इलेक्ट्रिक दुकानाचे शटर व कुलूप तोडून तांब्याची तार आणि साहित्य लंपास करणाऱ्या तीन चोरट्यांना एमआयडीसी पोलिसांनी शिताफीने बेड्या ठोकल्या आहेत. त्यांच्याकडून चोरीस गेलेली तांब्याची तार आणि गुन्ह्यात वापरलेली मोटारसायकल असा एकूण ९० हजार रुपयांचा मुद्देमाल हस्तगत करण्यात आला आहे.
पोलिसांनी दिलेल्या माहितीनुसार, ३ सप्टेंबरच्या रात्री ८:३० ते ४ सप्टेंबरच्या सकाळी ८:३० वाजेदरम्यान चोरट्यांनी फिर्यादी यांच्या ‘मातोश्री’ इलेक्ट्रिक दुकानाचे शटर आणि कुलूप तोडून आत प्रवेश केला. दुकानातील दुरुस्तीचे साहित्य आणि सुमारे ४० किलो वजनाची नवीन व जुनी तांब्याची तार चोरून नेली. या प्रकरणी एमआयडीसी पोलिसांत गुन्हा दाखल करण्यात आला होता.
गुन्ह्याचे गांभीर्य ओळखून पोलिस अधीक्षक श्रीकांत धिवरे, अपर पोलिस अधीक्षक संदीप गावित आणि उपविभागीय पोलिस अधिकारी नितीन गणापुरे यांच्या मार्गदर्शनाखाली एमआयडीसी पोलिस ठाण्याचे प्रभारी पोलिस निरीक्षक बबन आहाड यांनी तपासाची चक्रे वेगाने फिरवली. घटनास्थळावरील पुरावे, सीसीटीव्ही फुटेज आणि गोपनीय खबऱ्यांकडून मिळालेल्या तांत्रिक माहितीच्या आधारे पोलिसांनी संशयित हर्षल गोपाल परदेशी (वय २२, रा. सुप्रिम कॉलनी, जळगाव), कमलेश सुरेश पवार (वय २१, रा. कुसुंबा, जळगाव) आणि रितेश निवृत्ती साळुंखे (वय २२, रा. कुसुंबा, जळगाव) या तिघांना ताब्यात घेतले.
पोलिसी खाक्या दाखवताच संशयितांनी चोरीची कबुली दिली. पोलिसांनी त्यांच्याकडून ६० हजार रुपये किमतीची ४० किलो नवीन व जुनी तांब्याची तार आणि चोरीसाठी वापरलेली ३० हजार रुपये किमतीची हिरो होंडा स्प्लेंडर मोटारसायकल असा एकूण ९० हजारांचा मुद्देमाल जप्त केला. या प्रकरणी भारतीय न्याय संहितेच्या कलम ३०५(अ) व ३३१(२) अन्वये गुन्हा दाखल असून चंद्रकांत पुंडलिक धनके व सहकारी पुढील तपास करत आहेत.
