दोन दिवसांच्या कालावधीत अज्ञात चोरट्यांचा डल्ला; एरंडोल पोलिस ठाण्यात गुन्हा दाखल
एरंडोल, ( प्रतिनिधी ) – एरंडोल शहरातील अष्टविनायक कॉलनी परिसरात घरफोडी करून अज्ञात चोरट्यांनी तब्बल ७ लाख ८ हजार रुपयांचा ऐवज लंपास केल्याची घटना समोर आली आहे. चोरट्यांनी घराच्या दोन दरवाजांचे कुलूप तोडून घरात प्रवेश केला. त्यानंतर ३ लाख ५० हजार रुपयांची रोकड तसेच सोन्या-चांदीचे दागिने असा लाखोंचा मुद्देमाल चोरून नेला.
पोलिसांनी दिलेल्या माहितीनुसार, २ सप्टेंबर २०२६ रोजी सकाळी ११ वाजेपासून ३ सप्टेंबर रोजी मध्यरात्री १२.२५ वाजेपर्यंत ही घरफोडी झाल्याचे निष्पन्न झाले आहे. याप्रकरणी एरंडोल पोलिस ठाण्यात गुन्हा क्रमांक ०१६६/२०२६ नोंद करण्यात आला आहे.
अज्ञात चोरट्यांनी फिर्यादीच्या घराच्या दोन दरवाजांचे कुलूप तोडून आत प्रवेश केला. घरातील ड्रॉवरमध्ये ठेवलेली ३ लाख ५० हजार रुपयांची रोकड तसेच सोन्या-चांदीचे विविध दागिने चोरून नेण्यात आले.
चोरीस गेलेल्या ऐवजामध्ये २५ ग्रॅम वजनाचे सोन्याचे मंगळसूत्र (किंमत सुमारे १ लाख रुपये), १२ ग्रॅमचे सोन्याचे मंगळसूत्र (४८ हजार रुपये), ८ ग्रॅम वजनाच्या दोन सोन्याच्या अंगठ्या (३२ हजार रुपये), ३० ग्रॅम वजनाची सोन्याची प्लेन चैन (१ लाख २० हजार रुपये), १२ ग्रॅम वजनाचे सोन्याचे कानातील जोड (४८ हजार रुपये) यांचा समावेश आहे.
याशिवाय ५० ग्रॅम वजनाची चांदीची गणपती मूर्ती आणि ५० ग्रॅम वजनाची चांदीची लक्ष्मी मूर्ती, प्रत्येकी सुमारे ५ हजार रुपये किमतीची असल्याचे नमूद करण्यात आले आहे.
रोकड व सोन्या-चांदीच्या दागिन्यांची मिळून एकूण ७ लाख ८ हजार रुपयांची चोरी झाल्याचे पोलिस नोंदीत नमूद आहे.
या घटनेमुळे अष्टविनायक कॉलनी परिसरातील नागरिकांमध्ये चिंता व्यक्त होत असून, चोरट्यांचा शोध घेण्याचे आव्हान पोलिसांसमोर आहे.
या प्रकरणी भारतीय न्याय संहिता कलम ३०५(अ), ३३१(३), ३३१(४) अन्वये गुन्हा दाखल करण्यात आला आहे. फिर्यादी निखिल अनिल चव्हाण (वय ३५, रा. अष्टविनायक कॉलनी, एरंडोल) यांच्या तक्रारीवरून हा गुन्हा नोंदविण्यात आला.
सपोनि श्री. शंकर पवार यांच्या मार्गदर्शनाखाली पुढील तपास सुरू असून, अज्ञात आरोपींचा शोध घेण्यासाठी पोलिसांकडून तपासाची चक्रे वेगाने फिरवली जात आहेत.
