LCB-एमआयडीसी पोलिसांची संयुक्त कारवाई
दर्गा परिसरात मध्यरात्री सापळा
पोलिसांना एमआयडीसी परिसरात एका व्यक्तीकडून अमली पदार्थांची विक्री केली जाणार असल्याची गोपनीय माहिती मिळाली होती. या माहितीच्या आधारे ३१ ऑगस्ट रोजी रात्री सुमारे ११.४० वाजता दर्गा परिसरातील रस्त्यावर पोलिसांनी सापळा रचला.
यावेळी नूर मोहम्मद अब्दुल सलाम पटेल (वय ५५, रा. रामानंदनगर/मेहरुण, जळगाव) हा मोपेडवरून येताना पोलिसांना दिसला. पोलिसांनी त्याला थांबवून झडती घेतली असता मोपेडमध्ये अमली पदार्थ आढळून आले.
१ किलो ९६३ ग्रॅम इफेड्रीन, २ किलो ११४ ग्रॅम गांजा
झडतीमध्ये १ किलो ९६३ ग्रॅम इफेड्रीन पावडर, २ किलो ११४ ग्रॅम गांजा तसेच सुझुकी बर्गमन मोपेड असा मुद्देमाल मिळून आला.
जप्त मुद्देमाल वजन अंदाजे किंमत
इफेड्रीन १ किलो ९६३ ग्रॅम ₹९ लाख ८१ हजार ५००
गांजा २ किलो ११४ ग्रॅम ₹१ लाख ५ हजार ७००
बर्गमन मोपेड — ₹३० हजार
एकूण ४ किलो ७७ ग्रॅम ₹११ लाख १७ हजार २००
पोलिसांच्या माहितीनुसार, जप्त पदार्थांची प्राथमिक फॉरेन्सिक तपासणी करण्यात आली असून ते इफेड्रीन व गांजा असल्याचे निष्पन्न झाले.
एमडी निर्मितीसाठी इफेड्रीनचा वापर?
पोलिसांच्या माहितीनुसार, इफेड्रीनचा वापर ‘एमडी’ या अमली पदार्थाच्या निर्मितीसाठी केला जात असल्याचे तपासात समोर आले आहे. जप्त करण्यात आलेला इफेड्रीन व गांजा नेमका कुठून आणण्यात आला आणि या तस्करीच्या साखळीत आणखी कोणाचा सहभाग आहे का, याचा तपास सुरू आहे.
NDPS कायद्यान्वये गुन्हा दाखल
या प्रकरणी एमआयडीसी पोलीस ठाण्यात NDPS Act, 1985 अंतर्गत गुन्हा दाखल करण्यात आला आहे. गुन्हा क्रमांक ७०४/२०२६ असून पुढील तपास पोलिसांकडून सुरू आहे.
LCB-एमआयडीसी पोलिसांची संयुक्त कारवाई
ही कारवाई पोलीस अधीक्षक श्रीकांत धिवरे, अपर पोलीस अधीक्षक संदीप गावीत आणि उपविभागीय पोलीस अधिकारी नितीन गणापुरे यांच्या मार्गदर्शनाखाली स्थानिक गुन्हे शाखा व एमआयडीसी पोलिसांच्या पथकाने केली. जळगाव पोलिसांकडून अमली पदार्थांविरोधातील कारवाया सुरू असून, अशा तस्करीविरोधात कठोर कारवाईचा इशारा देण्यात आला आहे.
