जळगाव (प्रतिनिधी):-गोदावरी फाउंडेशन संचलित ‘गोदावरी इन्स्टिट्यूट ऑफ मॅनेजमेंट अँड रिसर्च’ (GIMR), जळगाव येथे राष्ट्रीय क्रीडा दिनाचे औचित्य साधून विविध उपक्रम व मैदानी स्पर्धांचे उत्साहात आयोजन करण्यात आले.
भारतीय हॉकीचे महान खेळाडू मेजर ध्यानचंद यांच्या जयंतीनिमित्त सर्वप्रथम डॉ. चेतन सरोदे यांच्या हस्ते त्यांच्या प्रतिमेस पुष्पहार अर्पण करून अभिवादन करण्यात आले. विद्यार्थ्यांमध्ये खेळाविषयी आवड निर्माण व्हावी तसेच त्यांच्या शारीरिक व मानसिक गुणवत्तेला वाव मिळावा, या उद्देशाने या स्पर्धा भरवण्यात आल्या होत्या. यामध्ये १०० मीटर धावणे, स्टँडिंग ब्रॉड जंप आणि शटल रन यांसारख्या विविध मैदानी क्रीडा प्रकारांचा समावेश होता. विद्यार्थ्यांनी या स्पर्धांमध्ये मोठ्या उत्साहाने सहभाग नोंदवला.
या प्रसंगी प्रमुख उपस्थित प्रा. चंद्रकांत डोंगरे यांनी मार्गदर्शन करताना सांगितले की, “खेळांमुळे विद्यार्थ्यांमध्ये संघभावना, नेतृत्वगुण आणि शिस्त निर्माण होण्यास मदत होते.”
या कार्यक्रमास महाविद्यालयातील प्राध्यापक, शिक्षकेतर कर्मचारी व विद्यार्थी मोठ्या संख्येने उपस्थित होते. स्पर्धा यशस्वी करण्यासाठी प्रा. चंद्रकांत डोंगरे व क्रीडा विभागातील कर्मचाऱ्यांनी विशेष परिश्रम घेतले. संपूर्ण कार्यक्रमाचे उत्कृष्ट सूत्रसंचालन प्रा. स्मिता चौधरी यांनी केले.
