भरधाव मालवाहू ॲपेने रिक्षाला धडक; तिघे जखमी
जळगाव | प्रतिनिधी : शिरसोली ते जळगाव रस्त्यावर फौजी ढाब्यासमोर भरधाव मालवाहू ॲपेने रिक्षाला मागून जोरदार धडक दिल्याने झालेल्या अपघातात रिक्षातील तिघे जखमी झाले. ही घटना २१ ऑगस्ट रोजी रात्री सुमारे ९ वाजता घडली.
रिक्षाला मागून धडक
मिळालेल्या माहितीनुसार, तक्रारदार सय्यद नियाजअली सय्यद बाबू (वय ५२, रा. ता. यावल, सध्या फातेमानगर, जळगाव) हे नातेवाईक शकील अहमद गुलाम आणि सय्यद नवाजअली सय्यद यांच्यासह रिक्षाने पाचोरा येथून जळगावकडे येत होते.
दरम्यान, शिरसोली ते जळगाव रस्त्यावरील फौजी ढाब्यासमोर त्यांच्या रिक्षाला मागून येणाऱ्या मालवाहू ॲपे क्रमांक एमएच-१९ बीएम-२४१४ च्या चालकाने रस्त्याच्या परिस्थितीकडे दुर्लक्ष करून भरधाव वेगाने धडक दिली.
रिक्षा पलटी; तिघांना मार लागला
धडकेनंतर रिक्षा पलटी झाल्याने तक्रारदारासह शकील अहमद गुलाम आणि रिक्षाचालक मुश्ताक शहा पिरन शहा हे तिघेही रस्त्यावर पडले. या अपघातात तिघांना मार लागून रिक्षाचेही नुकसान झाले.
अपघातानंतर ॲपे चालक घटनास्थळावरून निघून गेल्याचे तक्रारीत नमूद करण्यात आले आहे. या प्रकरणी २३ ऑगस्ट रोजी एमआयडीसी पोलीस ठाण्यात गुन्हा क्रमांक ६९१/२०२६ नुसार भारतीय न्याय संहिता कलम २८१, १२५(अ), ३२४(४) तसेच मोटार वाहन कायदा कलम १८४ अन्वये गुन्हा दाखल करण्यात आला आहे.
पुढील तपास पोहेकॉ. संदीप सपकाळे करीत आहेत.
