अजिंठा चौफुलीजवळ भरधाव चारचाकीची पादचाऱ्याला धडक
अपघातात ४८ वर्षीय व्यक्ती गंभीर जखमी; अज्ञात चालकाविरुद्ध एमआयडीसी पोलीस ठाण्यात गुन्हा
जळगाव | प्रतिनिधी : जळगाव शहरातील जळगाव-भुसावळ रोडवरील ट्रान्सपोर्टनगरसमोर अजिंठा चौफुलीजवळ भरधाव चारचाकीने पायी जाणाऱ्या व्यक्तीला जोरदार धडक दिल्याची घटना घडली. या अपघातात ४८ वर्षीय व्यक्ती गंभीर जखमी झाली. याप्रकरणी एमआयडीसी पोलीस ठाण्यात अज्ञात वाहनचालकाविरुद्ध गुन्हा दाखल करण्यात आला आहे.
पायी जात असताना धडक
पोलिसांनी दिलेल्या माहितीनुसार, मधुकर रामदास पाटील (वय ४८, रा. एकुलती खु., ता. जामनेर, जि. जळगाव) हे २० ऑगस्ट रोजी दुपारी सुमारे १ वाजता जळगाव ते भुसावळ मार्गावर अजिंठा चौफुलीकडे पायी जात होते. यावेळी ट्रान्सपोर्टनगरसमोर एका चारचाकी वाहनाने त्यांना मागून जोरदार धडक दिली.
डोक्यासह हाताला गंभीर दुखापत
अपघातानंतर वाहनचालकाने परिस्थितीकडे दुर्लक्ष करून भरधाव वेगाने वाहन चालवत घटनास्थळावरून पलायन केल्याचा आरोप आहे. धडकेत मधुकर पाटील यांच्या डोक्याला, तोंडाच्या जबड्याला तसेच उजव्या हाताला गंभीर दुखापत झाली.
अपघातानंतर जखमीला मदत न करता वाहनचालक निघून गेल्याचे फिर्यादीत नमूद करण्यात आले आहे.
अज्ञात चालकाविरुद्ध गुन्हा दाखल
या प्रकरणी जखमींचे पुतणे किशोर भिकारी पाटील (वय २६, व्यवसाय शेती, रा. एकुलती खु., ता. जामनेर) यांच्या फिर्यादीवरून एमआयडीसी पोलीस ठाण्यात गुन्हा क्रमांक ६८९/२०२६ दाखल करण्यात आला आहे.
अज्ञात चालकाविरुद्ध भारतीय न्याय संहितेच्या कलम २८१, १२५(अ), १२५(ब), ११५(२), ३५२, ३५१(२), ३२४(२), ३(५) तसेच मोटार वाहन कायद्याच्या कलम १८४ व १३४(ब) अन्वये गुन्हा दाखल करण्यात आला आहे. पुढील तपास पोलीस हवालदार रामदास कुंभार करीत आहेत.
