ग्रामसभेत पत्नी-मुलाला शिवीगाळ केल्याच्या कारणावरून शेतकऱ्याला मारहाण; सहा जणांविरुद्ध गुन्हा
जामनेर | प्रतिनिधी — तालुक्यातील टाकळी बु. येथे सुरू असलेल्या ग्रामसभेदरम्यान शेतकऱ्याच्या पत्नी व मुलाला शिवीगाळ केल्याच्या कारणावरून झालेल्या वादाचे पर्यवसान मारहाणीत झाले. लाथाबुक्क्यांनी मारहाण करण्यासोबतच फायबरच्या खुर्चीनेही मारहाण करण्यात आल्याची तक्रार असून, या प्रकरणी सहा जणांविरुद्ध जामनेर पोलीस ठाण्यात गुन्हा दाखल करण्यात आला आहे. मारहाणीत फिर्यादीच्या पत्नीच्या गळ्यातील सोन्याची पोत तुटून नुकसान झाल्याचेही तक्रारीत नमूद आहे.
या प्रकरणी भाऊराव आनंदा मोरे (वय ५६, व्यवसाय शेती, रा. टाकळी बु., ता. जामनेर) यांनी पोलिसांत फिर्याद दिली आहे. त्यानुसार, १५ ऑगस्ट रोजी सकाळी साडेआठच्या सुमारास टाकळी बु. येथील ग्रामपंचायत कार्यालयाच्या अंगणात ग्रामसभा सुरू होती. यावेळी काही जणांनी अचानक गैरकायदेशीरपणे जमाव करून फिर्यादीची पत्नी व मुलगा चेतन यांना शिवीगाळ केल्याचा आरोप आहे.
फिर्यादीने संबंधितांना समजावून सांगण्याचा प्रयत्न केला असता वाद अधिक वाढला. त्यानंतर संबंधितांनी फिर्यादी, त्यांची पत्नी व मुलगा चेतन यांना शिवीगाळ करून लाथाबुक्क्यांनी मारहाण केल्याचे तक्रारीत म्हटले आहे. यावेळी दिपक ज्ञानेश्वर सपकाळ याने बाजूची फायबरची खुर्ची उचलून मारहाण केल्याचाही आरोप करण्यात आला आहे.
या मारहाणीमध्ये फिर्यादीच्या पत्नीच्या गळ्यातील सोन्याची पोत तुटून नुकसान झाल्याचेही तक्रारीत नमूद करण्यात आले आहे. ग्रामसभेसारख्या सार्वजनिक ठिकाणी झालेल्या या प्रकारामुळे काही काळ वातावरण तणावपूर्ण झाले होते.
या प्रकरणी दिपक ज्ञानेश्वर सपकाळ, विनोद प्रल्हाद पाटील, सुमित संजय सपकाळ, मुकुंदा समाधान सपकाळ, अमोल माधव पाटील आणि अभिषेक ज्ञानेश्वर सपकाळ, सर्व रा. टाकळी बु., ता. जामनेर, यांच्याविरुद्ध गुन्हा क्रमांक ३८४/२०२६ नोंद करण्यात आला आहे. भारतीय न्याय संहितेतील कलम ११८(१), ११५(२), ३५२, ३२४(४), १८९(२), १९० व १९१(२) अन्वये गुन्हा दाखल करण्यात आला आहे.
घटनेची माहिती मिळाल्यानंतर पोलिसांनी प्रकरणाची नोंद घेत पुढील तपास सुरू केला आहे. सफौ/६२६ सुनील जोशी हे तपास करीत आहेत. ग्रामसभेच्या ठिकाणी झालेल्या या मारहाणीच्या घटनेमुळे टाकळी बु. परिसरात चर्चेला उधाण आले आहे.
