भुसावळात हुडको कॉलनीत बंद घर फोडून पावणेदोन लाखांचे सोन्या-चांदीचे दागिने अन् रोख रक्कम लांबवली; बाजारपेठ पोलिसांत गुन्हा दाखल
भुसावळ: भुसावळ शहरातील हुडको कॉलनी भागात एका बंद घराचे कडी-कुलूप तोडून अज्ञात चोरट्यांनी आत प्रवेश करत लाकडी कपाटातील तब्बल १ लाख ८० हजार ५०० रुपये किमतीचे सोन्या-चांदीचे दागिने आणि रोख रक्कम लांबवल्याची धक्कादायक घटना समोर आली आहे. या प्रकरणी भुसावळ बाजारपेठ पोलीस ठाण्यात अज्ञात चोरट्याविरुद्ध गुन्हा दाखल करण्यात आला आहे.
पोलीस सूत्रांकडून मिळालेल्या सविस्तर माहितीनुसार, अजय राजकुमार सभांग चदाणी (वय ३०, व्यवसाय- कपड्यांचे दुकान, रा. फ्लॅट नं. २०२, दुसरा मजला, गजानन अपार्टमेंट, गजानन मंदिराजवळ, हुडको कॉलनी, भुसावळ) यांनी या प्रकरणी फिर्याद दिली आहे. ३ ऑगस्ट २०२६ रोजी दुपारी २.०० वाजेच्या सुमारास ही घरफोडीची घटना घडली.
फिर्यादी घर बंद करून गेलेले असताना अज्ञात चोरट्याने त्यांच्या घराच्या मुख्य दरवाजाचे कुलूप तोडून अनधिकृतपणे आत प्रवेश केला. कपाटातील लॉकरमध्ये ठेवलेले १ लाख ३५ हजार ५०० रुपये किमतीचे सोन्या-चांदीचे दागिने तसेच ४५ हजार रुपयांची रोख रक्कम (५०० रुपयांच्या १८० नोटा) असा एकूण १ लाख ८० हजार ५०० रुपयांचा ऐवज चोरट्याने पळवून नेला.
चोरीस गेलेल्या दागिन्यांमध्ये ४५ हजार रुपये किमतीचे १७ ग्रॅमचे सोन्याचे मंगळसूत्र व साखळी, २८ हजार रुपये किमतीचे १२ ग्रॅमचे सोन्याचे टॉप्स (३ जोड्या), १६ हजार रुपये किमतीची ७ ग्रॅमची सोन्याची अंगठी, १६ हजार रुपये किमतीची ४ ग्रॅमची सोन्याची अंगठी, १२ हजार रुपये किमतीचे लहान मुलीचे सोन्याचे टॉप्स (२ जोड्या), ६ हजार रुपये किमतीच्या लहान मुलीच्या सोन्याच्या चार अंगठ्या, ८ हजार रुपयांची सोन्याची ‘ओम’ आकाराची दोन पेंडंट्स, ३ हजार रुपयांचे ४० ग्रॅमचे चांदीचे पैंजण आणि १५०० रुपयांचे २० ग्रॅमचे चांदीचे जोडवे यांचा समावेश आहे.
या प्रकरणी ६ ऑगस्ट २०२६ रोजी सायंकाळी ४.०५ वाजता भुसावळ बाजारपेठ पोलीस ठाण्यात गुन्हा नोंद क्रमांक ३६७/२०२६ नुसार भारतीय न्याय संहिता (BNS) कलम ३०५(a) व ३३१(१)(३) अन्वये गुन्हा नोंदवण्यात आला आहे.
घटनेची माहिती मिळताच उपविभागीय पोलीस अधिकारी केदार बारबोले आणि पोलीस निरीक्षक राहुल तुकाराम वाघ यांनी घटनास्थळी भेट देऊन पाहणी केली. या प्रकरणाचा पुढील सखोल तपास पोलीस उपनिरीक्षक मोहम्मद अली सय्यद करत असून आरोपीचा शोध सुरू आहे.
