जंगलात पळालेल्या आरोपीला अडावद पोलिसांनी घेतले ताब्यात
अडावद| (प्रतिनिधी) – जळगाव जिल्ह्यातील चोपडा तालुक्यातील वडती गावात जन्मदात्या बापानेच आपल्या दोन अल्पवयीन मुलांवर झोपेत असताना कुऱ्हाडीने सपासप वार केल्याची अत्यंत हृदयद्रावक घटना रविवारी पहाटे उघडकीस आली. या अमानुष हल्ल्यात १३ वर्षीय मुलीचा जागीच मृत्यू झाला, तर ११ वर्षीय मुलगा गंभीर जखमी झाला असून त्याच्यावर रुग्णालयात उपचार सुरू आहेत. या घटनेमुळे संपूर्ण परिसरात हळहळ व्यक्त होत आहे.
मिळालेल्या माहितीनुसार, मीरा सुभाष भिलाला (वय १३) असे मृत मुलीचे, तर रामू सुभाष भिलाला (वय ११) असे गंभीर जखमी मुलाचे नाव आहे. रामूची प्रकृती चिंताजनक असून त्याच्यावर वैद्यकीय उपचार सुरू आहेत.
घटनेनंतर संशयित आरोपी सुभाष गोपाळ भिलाला (वय ५०) हा जंगलाच्या दिशेने पसार झाला होता. घटनेची माहिती मिळताच अडावद पोलीस ठाण्याचे अधिकारी व कर्मचाऱ्यांनी तातडीने शोधमोहीम हाती घेत जंगल परिसरातून आरोपीला शिताफीने ताब्यात घेतले. सध्या त्याची कसून चौकशी सुरू आहे.
प्राथमिक तपासानुसार, रविवारी पहाटे दोन्ही मुले घरात गाढ झोपेत असताना आरोपीने कुऱ्हाड घेऊन त्यांच्या मानेवर व शरीरावर सपासप वार केले. या भीषण हल्ल्यात मीरा हिचा घटनास्थळीच मृत्यू झाला, तर रामू गंभीर जखमी झाला. हल्ल्यानंतर आरोपी घटनास्थळावरून पळून गेला होता.
दरम्यान या दुहेरी हल्ल्यामागील नेमके कारण अद्याप स्पष्ट झालेले नाही. आरोपीला दारूचे व्यसन असल्याची प्राथमिक माहिती समोर आली असून कौटुंबिक वाद, मानसिक अस्थिरता किंवा अन्य कोणत्या कारणातून हा प्रकार घडला, याचा पोलीस सर्व बाजूंनी तपास करीत आहेत. चौकशीनंतरच हल्ल्यामागील खरी कारणे स्पष्ट होणार आहेत.
आरोपी याला तीन मुले आणि तीन मुली असून दोन मुले आणि मुलींचे लग्न झाले आहे. घटना घडली त्या दरम्यान पत्नी हि जळगाव शिवाजी नगर येथे दूध फेडरेशन परिसरात राहायला असून आरोपी हा घर दुरुस्ती करण्यासाठी वडती येथे दोन मुलांना घेऊन तीन दिवसापूर्वी आला होता . दरम्यान त्याच्यावर यापूर्वी देखील ३०७ कालमानवये गुन्हा देखील दाखल असल्याची माहिती सूत्रांकडून मिळाली.
या धक्कादायक घटनेमुळे वडती गावासह संपूर्ण चोपडा तालुक्यात शोककळा पसरली आहे. अडावद पोलिसांनी घटनास्थळी पंचनामा करून महत्त्वाचे पुरावे संकलित केले आहेत. आरोपीविरुद्ध भारतीय न्याय संहितेतील (BNS) संबंधित कलमान्वये खुनाचा तसेच खुनाच्या प्रयत्नाचा गुन्हा दाखल करण्याची प्रक्रिया सुरू असून पुढील तपास अडावद पोलीस करीत आहेत.
