‘केसरीराज’च्या बातमीचा दणका : काही कर्मचाऱ्यांचे पगार जमा, मात्र ‘डीएमईआर’ अंतर्गत कार्यरत कर्मचारी अद्याप वंचित
जळगाव (प्रतिनिधी ) -: येथील शासकीय वैद्यकीय महाविद्यालय व रुग्णालयातील कंत्राटी कर्मचाऱ्यांच्या थकीत वेतनाबाबत ‘केसरीराज’मध्ये बातमी प्रसिद्ध होताच ठेकेदाराला अखेर जाग आली आहे. बातमीचा दणका बसताच सोमवारी रात्रीपासून लिपिक, कक्ष सेवक आणि इलेक्ट्रिशियन व इतर संवर्गातील कर्मचाऱ्यांच्या बँक खात्यात पगार जमा होण्यास सुरुवात झाली असून गेल्या दोन दिवसांत अनेक कर्मचाऱ्यांना दिलासा मिळाला आहे.
मात्र, दुसरीकडे वैद्यकीय शिक्षण व संशोधन संचालनालयाअंतर्गत (DMER) नियुक्त असलेल्या आणि ‘स्मार्ट सर्व्हिस’ संस्थेमार्फत कार्यरत कर्मचाऱ्यांचे वेतन अद्यापही थकलेलेच आहे. ठेकेदाराच्या या मनमानी आणि उदासीन कारभाराविरुद्ध कर्मचाऱ्यांमध्ये प्रचंड असंतोष निर्माण झाला आहे.
‘स्मार्ट सर्व्हिस’ या ठेकेदार संस्थेमार्फत कार्यरत असलेल्या डीएमईआर कर्मचाऱ्यांचे मे आणि जून अशा दोन महिन्यांचे वेतन अद्याप मिळालेले नाही. तर इतर लिपिक, कक्षसेवक, टेलिफोन ऑपरेटर, प्लंबर, फिटर, इलेक्ट्रिशियन आणि लिफ्टमन या पदांवरील कर्मचाऱ्यांचेही जून महिन्याचे वेतन प्रलंबित होते.
रुग्णालयासारख्या संवेदनशील ठिकाणी अहोरात्र सेवा देऊनही पगार अडकल्याने कर्मचाऱ्यांवर उपासमारीची वेळ आली आहे. वेतन न मिळाल्याने कर्मचाऱ्यांचे बँकेचे हप्ते (EMI) थकले असून, दैनंदिन किराणा सामानासाठी उधारीवर अवलंबून राहावे लागत आहे. आर्थिक व मानसिक तणावामुळे रुग्णालयीन कामकाजावर विपरीत परिणाम होत असून कामात चुकांचे प्रमाण वाढत आहे.
ठरल्याप्रमाणे मिळणारी भत्ता वाढही अद्याप देण्यात आलेली नाही. आपल्या मागण्या मांडण्यासाठी कर्मचाऱ्यांनी आमदार राजूमामा भोळे यांच्याशी संपर्क साधण्याचा प्रयत्न केला. शासकीय वैद्यकीय महाविद्यालयाचे अधिष्ठाता डॉ. गिरीश ठाकूर यांच्याकडे कर्मचाऱ्यांनी दाद मागितली असता, “होईल पगार, मी ठेकेदाराला सांगतो,” असे मोघम उत्तर देऊन बोळवण करण्यात आल्याचा आरोप कर्मचाऱ्यांनी केला होता. मात्र आता ‘केसरीराज’च्या वृत्तामुळे अनेक कर्मचाऱ्यांना पगार मिळायला सुरुवात झाली आहे.
