४०० हून अधिक पोलिसांचे ‘ऑपरेशन कॉम्बिंग’; फरार आरोपींचा शोध, २७ घरांचे जिओ-टॅगिंग
जळगाव (प्रतिनिधी) – जळगाव जिल्ह्यातील गंभीर गुन्ह्यांतील फरार आरोपींचा शोध घेणे आणि आंतरराज्यीय अवैध शस्त्रनिर्मिती व तस्करीवर प्रभावी कारवाई करण्याच्या उद्देशाने जळगाव, नाशिक आणि धुळे पोलीस दलाने मध्य प्रदेशातील बडवाणी जिल्ह्यातील पार उमरटी (ता. वरला) येथे संयुक्त ‘ऑपरेशन कॉम्बिंग’ राबवत मोठी कारवाई केली. या मोहिमेत ३२ संशयित वाहने, देशी कट्टे, जिवंत काडतुसे तसेच शस्त्रनिर्मितीसाठी वापरले जाणारे साहित्य जप्त करण्यात आले.
पहाटे चार तास चालली शोधमोहीम
पोलीस अधीक्षक श्रीकांत धिवरे यांच्या मार्गदर्शनाखाली ही मोहीम राबविण्यात आली. मध्यरात्री संयुक्त पथक कारवाईसाठी रवाना झाले. पहाटे ४ ते सकाळी ८ या वेळेत पार उमरटी गावात नियोजनबद्ध शोधमोहीम राबविण्यात आली. चोपडा शहर, चोपडा ग्रामीण आणि नाशिक जिल्ह्यातील पवारवाडी पोलीस ठाण्यांमध्ये दाखल शस्त्र अधिनियम व इतर गंभीर गुन्ह्यांतील फरार संशयितांचा शोध घेण्यासाठी ही कारवाई करण्यात आली.
४०० हून अधिक पोलिसांचा सहभाग
या विशेष मोहिमेत जळगाव, नाशिक आणि धुळे जिल्ह्यातील मिळून ४०० हून अधिक पोलीस अधिकारी व कर्मचारी सहभागी झाले होते. यासाठी २० शासकीय वाहनांचा ताफा तैनात करण्यात आला होता. अपर पोलीस अधीक्षक अशोक नखाते, सहाय्यक पोलीस अधीक्षक सिद्धार्थ बारवाल यांच्यासह विविध उपविभागीय पोलीस अधिकारी आणि पोलीस निरीक्षकांनी मोहिमेचे नेतृत्व केले.
४५ घरांची झडती; १२ जण ताब्यात
कारवाईदरम्यान गावातील ४५ संशयित घरांची झडती घेण्यात आली. २० जणांची सखोल चौकशी करण्यात आली असून १२ संशयितांना ताब्यात घेण्यात आले आहे. चोपडा ग्रामीण पोलीस ठाण्याच्या गुन्ह्याच्या तपासादरम्यान दोन जणांकडून दोन देशी कट्टे आणि चार जिवंत काडतुसे जप्त करण्यात आली.
३२ वाहने जप्त, शस्त्रनिर्मितीचे साहित्य हस्तगत
या मोहिमेत पोलिसांनी ३२ निनावी तसेच महाराष्ट्र पासिंगच्या संशयित मोटारसायकली जप्त केल्या. याशिवाय देशी कट्टे तयार करण्यासाठी वापरला जाणारा कच्चा माल, विविध साचे आणि इतर साहित्यही हस्तगत करण्यात आले. फरार व संशयित २७ आरोपींच्या घरांचे जिओ-टॅगिंग करून आधुनिक तंत्रज्ञानाच्या मदतीने त्यांची नोंद करण्यात आली.
आंतरराज्यीय गुन्हेगारीविरोधात प्रभावी पाऊल
अवैध शस्त्रनिर्मिती आणि तस्करीच्या साखळीवर आळा घालण्यासाठी राबविण्यात आलेल्या या संयुक्त मोहिमेमुळे आंतरराज्यीय गुन्हेगारीविरोधातील तपासाला मोठी चालना मिळाली असून, भविष्यात अशा प्रकारच्या कारवाया अधिक तीव्र करण्यात येणार असल्याचे पोलीस सूत्रांनी सांगितले.
