पाचोरा येथील घटना
पाचोरा ( प्रतिनिधी ) – पाचोरा शहरात प्लॉट विक्रीच्या व्यवहारात एका महिलेची १३ लाख ५१ हजार रुपयांची फसवणूक झाल्याचा प्रकार समोर आला आहे. याप्रकरणी पाचोरा पोलीस ठाण्यात एका व्यक्तीविरुद्ध गुन्हा दाखल करण्यात आला असून पुढील तपास सुरू आहे.
पोलिसांनी दिलेल्या माहितीनुसार, सोनाली संदीप शेवरे (वय ४४, रा. गणेश कॉलनी, पाचोरा) यांनी फिर्याद दिली आहे. घर बांधण्यासाठी त्यांनी पाचोरा शहरातील सिटी सर्व्हे क्रमांक ३०३५, गट क्रमांक ३५, प्लॉट क्रमांक २२ मधील जागेचा व्यवहार केला होता.
फिर्यादीनुसार, रविंद्रसिंग सुमेरसिंग राजपूत (रा. पाचोरा) याने संबंधित प्लॉट स्वतःच्या मालकीचा असल्याचे सांगून ५ ऑगस्ट २०२४ ते १ जून २०२६ या कालावधीत विविध टप्प्यांमध्ये फिर्यादीकडून १३ लाख ५१ हजार रुपये स्वीकारले. मात्र, रक्कम घेतल्यानंतरही प्लॉटचा ताबा अथवा आवश्यक कागदपत्रे न देता आर्थिक फसवणूक केल्याची तक्रार करण्यात आली आहे.
या प्रकरणी पाचोरा पोलीस ठाण्यात गुन्हा क्रमांक ३३१/२०२६ भारतीय न्याय संहिता कलम ३१८(४) अन्वये दाखल करण्यात आला आहे.
या गुन्ह्याचा पुढील तपास सपोनि प्रदीप शेवाळे करीत आहे.
