कासोदा-पारोळा रस्त्यावरील शासकीय विश्रामगृहाजवळ कारवाई; वाळू माफियाविरुद्ध गुन्हा दाखल
एरंडोल (प्रतिनिधी): तालुक्यात अवैध वाळू उपसा आणि वाहतूक करणाऱ्या वाळू माफियांविरुद्ध महसूल विभागाने धडक मोहीम सुरूच ठेवली आहे. कासोदा ते पारोळा रस्त्यावरील शासकीय विश्रामगृहाजवळ (गेस्ट हाऊस) पहाटेच्या सुमारास नाकेबंदी करून महसूल अधिकाऱ्यांनी तब्बल ४ लाख १५ हजार रुपये किमतीचा मुद्देमाल जप्त केला आहे. याप्रकरणी एरंडोल पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, १५ जून २०२६ रोजी पहाटे ४.३० वाजेच्या सुमारास एरंडोल येथील ग्राममहसूल अधिकारी (तलाठी) आणि त्यांचे सहकारी कासोदा-पारोळा रस्त्यावरून जात असताना त्यांना एक संशयित डंपर येताना दिसला. महसूल पथकाने डंपर थांबवून तपासणी केली असता, त्यात शासकीय परवानगीशिवाय चोरटी अवैध वाळू भरलेली असल्याचे उघडकीस आले.
या कारवाईत महसूल पथकाने खालील मुद्देमाल जप्त केला आहे: १) १५,००० रुपये किमतीची सुमारे ३ ब्रास गौण खनिज वाळू. २) ४,००,००० रुपये किमतीचा ‘अशोक लेलँड’ कंपनीचा पांढऱ्या रंगाचा हायवा डंपर (क्रमांक: MH 28 BB 0374, चेसिस नंबर: MB1HTLHD0JPGB9524, इंजिन नंबर: JGPZ106879). असा एकूण ४,१५,००० (चार लाख पंधरा हजार) रुपयांचा मुद्देमाल जप्त करून एरंडोल पोलीस ठाण्यात लावला गेला आहे.
याप्रकरणी फिर्यादी ग्राममहसूल अधिकारी वैभव श्रीराम पाठे (वय ४२, रा. आनंद नगर, दत्तधाम कॉलनी, भुसावळ, ता. भुसावळ, जि. जळगाव) यांनी ७ जुलै २०२६ रोजी संध्याकाळी ६.४७ वाजता एरंडोल पोलीस ठाण्यात रीतसर फिर्याद दिली.
त्यांच्या तक्रारीवरून डंपर चालक तथा मालक आरोपी प्रशांत दिलीप चौधरी (वय २८, रा. एरंडोल, जि. जळगाव) याच्याविरुद्ध एरंडोल पोलीस ठाण्यात गुन्हा रजि. नं. १३१/२०२६, भारतीय न्याय संहिता (BNS) २०२३ च्या कलम ३०३(२) (चोरी) प्रमाणे गुन्हा दाखल करण्यात आला आहे. या गुन्ह्याची नोंद करताना पोलिसांकडून ‘ई-साक्ष’ प्रणालीचा वापर करण्यात आला आहे.
एरंडोल पोलीस ठाण्याचे पोलीस निरीक्षक सुनील हंसराज पवार यांच्या मार्गदर्शनाखाली पोलीस नाईक (पोना/३०३८) योगेश साहेबराव महाजन पुढील तपास करत आहेत. या गुन्ह्यात आरोपीला अद्याप अटक करण्यात आलेली नाही. महसूल आणि पोलीस प्रशासनाच्या या संयुक्त कारवाईमुळे एरंडोल परिसरातील वाळू माफियांचे धाबे दणाणले आहेत.
