दोन वर्षांपासून पीडितेचे लैंगिक शोषण; जीवे मारण्याची दिली होती धमकी
पाचोरा ( प्रतिनिधी ) – लग्नाचे खोटे आमिष दाखवून एका २९ वर्षीय महिला शेतमजुराशी जबरदस्तीने शारीरिक संबंध ठेवून अत्याचार केल्याची धक्कादायक घटना पाचोरा येथे उघडकीस आली आहे. याप्रकरणी पाचोरा पोलीस ठाण्यात गुन्हा दाखल करण्यात आला असून, पोलिसांनी तात्काळ कारवाई करत आरोपीला अटक केली आहे.अजय समाधान जाधव (रा. नांद्रे, ता. पाचोरा) असे अटक करण्यात आलेल्या आरोपीचे नाव आहे. याप्रकरणी २९ वर्षीय पीडित महिलेने पोलीस ठाण्यात फिर्याद दिली.
पोलिसांनी दिलेल्या माहितीनुसार, गेल्या दोन वर्षांपासून तसेच १३ मे २०२६ ते २९ जून २०२६ दरम्यान आरोपीने पीडितेची इच्छा नसतानाही तिला लग्नाचे आमिष दाखवून वेळोवेळी बळजबरीने शारीरिक संबंध ठेवले. तसेच या घटनेबाबत कोणास काही सांगितल्यास ‘तुला जीवे मारून टाकेल’, अशी धमकीही दिली होती. अखेर पीडित महिलेने पाचोरा पोलीस ठाण्यात धाव घेऊन लेखी तक्रार नोंदवली.
या तक्रारीवरून आरोपी अजय जाधव याच्याविरुद्ध भारतीय न्याय संहिता (BNS) कलम ६९ आणि ३५१(२) अन्वये गुन्हा दाखल करण्यात आला आहे. पाचोरा पोलीस ठाण्याचे पोलीस निरीक्षक राहुलकुमार पवार यांच्या मार्गदर्शनाखाली पोलीस उपनिरीक्षक योगेश गणगे या गुन्ह्याचा पुढील तपास करत आहेत. आरोपीला २९ जून रोजी सायंकाळी अटक करण्यात आली आहे.
