रात्री लघुशंकेसाठी थांबलेल्या युवकाला भरधाव वाहनाची जोरदार धडक; चालकाविरुद्ध गुन्हा दाखल, पोलिसांचा शोध सुरू
यावल (प्रतिनिधी) : यावल तालुक्यातील कोळन्हावी येथे अज्ञात वाहनाच्या धडकेत २४ वर्षीय युवकाचा मृत्यू झाल्याची दुर्दैवी घटना घडली. कोळन्हावी-डांभुर्णी मार्गावरील पाटाच्या चारीजवळ हा अपघात घडला असून, या प्रकरणी यावल पोलिस ठाण्यात अज्ञात वाहन चालकाविरुद्ध गुन्हा दाखल करण्यात आला आहे.
पवन रवींद्र कोळी (वय २४, रा. कोळन्हावी) असे मृत युवकाचे नाव आहे. पोलिसांनी दिलेल्या माहितीनुसार, गुरुवारी (दि. १८) मध्यरात्री साडेबारा वाजेच्या सुमारास पवन कोळी हे कोळन्हावी-डांभुर्णी रस्त्यावरील पाटाच्या चारीजवळ लघुशंकेसाठी थांबले होते. त्याचवेळी मागून भरधाव वेगाने आलेल्या अज्ञात वाहनाने त्यांना जोरदार धडक दिली.
या भीषण अपघातात त्यांच्या डोक्याला गंभीर दुखापत झाली. स्थानिक नागरिकांच्या मदतीने त्यांना तातडीने यावल ग्रामीण रुग्णालयात दाखल करण्यात आले. मात्र, वैद्यकीय अधिकाऱ्यांनी तपासणीनंतर त्यांना मृत घोषित केले. वैद्यकीय अधिकारी डॉ. तुषार सोनवणे यांनी मृतदेहाचे शवविच्छेदन केले.
घटनेची माहिती मिळताच यावल पोलिसांनी घटनास्थळी धाव घेत पंचनामा केला. कोळन्हावी येथील उमेश दिलीप परदेशी यांनी दिलेल्या फिर्यादीवरून अज्ञात वाहन चालकाविरोधात भारतीय न्याय संहिता कलम १०६ (१), २८१, १२५ (अ), १२५ (ब) तसेच मोटार वाहन कायद्यातील कलम १३४ अन्वये गुन्हा दाखल करण्यात आला आहे.
दरम्यान, या अपघातामुळे कोळन्हावी परिसरात हळहळ व्यक्त होत असून, अपघातास कारणीभूत ठरलेल्या वाहनाचा शोध घेण्यासाठी पोलिसांनी तपासाची चक्रे वेगाने फिरवली आहेत. पुढील तपास पोलीस निरीक्षक रंगनाथ धारबळे यांच्या मार्गदर्शनाखाली सहाय्यक फौजदार वसंत बेलदार करीत आहेत.
