पाचोरा तालुक्यातील पिंप्री खुर्द येथील घटना; पोलिसांकडून अकस्मात मृत्यूची नोंद
पाचोरा (प्रतिनिधी) : पाचोरा तालुक्यातील पिंप्री खुर्द येथील ३८ वर्षीय व्यक्तीचा उपचारादरम्यान मृत्यू झाल्याची घटना समोर आली आहे. या प्रकरणी पिंपळगाव हरे पोलीस ठाण्यात अकस्मात मृत्यूची नोंद करण्यात आली असून पुढील तपास सुरू आहे.
मिळालेल्या माहितीनुसार, गोकुळ पांडुरंग पाटील (वय ३८, रा. पिंप्री खुर्द, ता. पाचोरा) यांना अचानक अस्वस्थ वाटू लागल्याने कुटुंबीयांनी त्यांना उपचारासाठी पाचोरा येथील खासगी रुग्णालयात दाखल केले. प्रकृती गंभीर असल्याने डॉक्टरांनी पुढील उपचारासाठी त्यांना शासकीय रुग्णालयात हलविण्याचा सल्ला दिला.
दरम्यान, शासकीय रुग्णालयात उपचार सुरू असताना डॉक्टरांनी तपासणी करून दुपारी सुमारे १ वाजेच्या सुमारास त्यांना मृत घोषित केले. घटनेची माहिती पोलिसांना देण्यात आल्यानंतर पिंपळगाव हरे पोलीस ठाण्यात अकस्मात मृत्यू क्रमांक १८/२०२६ नोंदविण्यात आला.
वैद्यकीय अधिकाऱ्यांच्या लेखी अहवालावरून ही नोंद करण्यात आली असून मृत्यूचे नेमके कारण शवविच्छेदन अहवालानंतर स्पष्ट होणार आहे. या प्रकरणाचा पुढील तपास पोहेकॉ. अतुल पवार करीत आहेत.
मृत्यूचे कारण अद्याप स्पष्ट झाले नसून, शवविच्छेदन अहवाल प्राप्त झाल्यानंतरच अधिकृत माहिती समोर येणार असल्याचे पोलिसांनी सांगितले आहे. मृत्यूच्या घटनेमुळे परिसरात हळहळ व्यक्त होत आहे.
