लोखंडी रॉडने हल्ला; चोपडा शहर पोलिस ठाण्यात गुन्हा दाखल
चोपडा (प्रतिनिधी) :- तालुक्यातील आडगाव येथे क्रिकेट खेळताना झालेल्या किरकोळ वादाचे रूपांतर हाणामारीत झाल्याची घटना समोर आली आहे. या प्रकरणी सहाजणांसह १८ ते १९ अनोळखी व्यक्तींविरुद्ध चोपडा शहर पोलिस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, आडगाव गावातील बुद्ध विहाराजवळ सार्वजनिक जागेत २६ मे रोजी सायंकाळी सव्वासहाच्या सुमारास क्रिकेट खेळ सुरू होते. यावेळी चेंडू लागल्याच्या कारणावरून दोन गटांमध्ये वाद झाला. त्यानंतर आरोपींनी फिर्यादी ईश्वर छगन बाविस्कर (वय ५०, व्यवसाय किराणा दुकान, रा. आडगाव ता. चोपडा) यांना शिवीगाळ करत मारहाण केली.
या मारहाणीत गोपाळ कोळी याने हातातील लोखंडी रॉडने डोक्यात वार केल्याचे फिर्यादीत नमूद करण्यात आले आहे. तसेच भांडण सोडवण्यासाठी आलेल्या हिमांशू ईश्वर बाविस्कर व मायाबाई ईश्वर बाविस्कर यांनाही मारहाण झाली.
या प्रकरणी गोपाळ कोळी, कुणाल भोई, अक्षय कोळी, राजेंद्र कोळी, कल्पेश कोळी, मुकेश कोळी तसेच इतर अनोळखी १८ ते १९ जणांविरुद्ध भारतीय न्याय संहितेच्या विविध कलमान्वये गुन्हा दाखल करण्यात आला आहे. पुढील तपास पोहेकॉ राजेंद्र पुडलीक कोळी करीत आहेत.
