मुक्ताईनगर पोलिसांची धडाकेबाज कारवाई; पिस्तूल, जिवंत काडतुसे, स्कॉर्पिओसह ५.६० लाखांचा मुद्देमाल जप्त
मुक्ताईनगर (प्रतिनिधी) :- घोडसगाव येथील राष्ट्रीय महामार्गावरील पुलाजवळ दरोड्याच्या तयारीत असलेल्या टोळीवर मुक्ताईनगर पोलिसांनी धाडसी कारवाई करत दोन संशयितांना अटक केली असून तीन जण फरार झाले आहेत. या कारवाईत पिस्तूल, जिवंत काडतुसे, स्कॉर्पिओ वाहन, मोबाईल फोन व इतर साहित्य असा ५ लाख ६० हजार ४०० रुपयांचा मुद्देमाल जप्त करण्यात आला आहे.
पोलिसांनी दिलेल्या माहितीनुसार, २९ मे २०२६ रोजी पहाटे ६ वाजेच्या सुमारास घोडसगाव पुलाजवळ काही संशयित इसम दरोड्याच्या तयारीत असल्याची माहिती मिळाली होती. त्यानुसार मुक्ताईनगर पोलिसांनी सापळा रचून कारवाई केली.
या प्रकरणी चंद्रकांत विष्णू वाघ (वय ३०) व कैलास कारभारी घोडके (वय ३२, दोघे रा. चिंचोली आडगाव, जि. छत्रपती संभाजीनगर) यांना अटक करण्यात आली. तर प्रशांत उर्फ परशुराम मोहन गायकवाड व त्याचे दोन साथीदार फरार झाले आहेत.
पिस्तूल, काडतुसे आणि स्कॉर्पिओ जप्त
कारवाईदरम्यान पोलिसांनी आरोपींकडून एक स्कॉर्पिओ वाहन (एमएच-१९ बीयू-६६९५), गावठी पिस्तूल, दोन जिवंत काडतुसे, लोखंडी रॉड, दोरी, मिरची पावडर, आयफोन व ओप्पो कंपनीचे मोबाईल फोन असा एकूण ५.६० लाख रुपयांहून अधिक किमतीचा मुद्देमाल जप्त केला.
गुन्हा दाखल
या प्रकरणी मुक्ताईनगर पोलीस ठाण्यात भारतीय न्याय संहिता कलम ३१०(४) तसेच शस्त्र अधिनियम कलम ३/२५ अन्वये गुन्हा दाखल करण्यात आला आहे.
वरिष्ठ अधिकाऱ्यांची भेट
घटनेची माहिती मिळताच उपविभागीय पोलीस अधिकारी केदार बारबोले यांनी घटनास्थळी भेट देऊन पाहणी केली. पुढील तपास पोलीस निरीक्षक राजेंद्र चाटे यांच्या मार्गदर्शनाखाली सुरू आहे.
पोलिसांची सतर्कता; मोठा गुन्हा टळला
वेळीच मिळालेल्या माहितीच्या आधारे मुक्ताईनगर पोलिसांनी कारवाई केल्यामुळे संभाव्य दरोडा टळला असून परिसरात पोलिसांच्या या कामगिरीचे कौतुक होत आहे.
