महसूल अधिकाऱ्यांच्या पाहणीदरम्यान तणाव; चौघांविरुद्ध गुन्हा दाखल
जळगाव ( प्रतिनिधी ) – बोदवड तालुक्यात शेतजमिनीच्या सीमांकनाच्या वादातून मारहाणीची घटना घडली असून या प्रकरणी चौघांविरुद्ध बोदवड पोलीस ठाण्यात गुन्हा दाखल करण्यात आला आहे. महसूल अधिकाऱ्यांकडून शेतसीमा पाहणी सुरू असताना हा प्रकार घडल्याने परिसरात तणावाचे वातावरण निर्माण झाले.
या प्रकरणी विजय गोविंदा चौधरी (वय ५५, रा. कु-हाडे, ता. बोदवड) यांनी फिर्याद दिली आहे. त्यांच्या तक्रारीनुसार, २६ मे २०२६ रोजी दुपारी एक वाजेच्या सुमारास त्यांच्या शेत गट क्रमांक १६७/४ येथे महसूल अधिकारी सीमांकनासाठी आले होते. यावेळी संबंधित पाहणीवरून वाद निर्माण झाला.
या वादातून आरोपी अशोक सिताराम शेळके, चंदाबाई अशोक शेळके, सुपडाबाई आनंदा शेळके आणि भगवान आनंदा शेळके (सर्व रा. कु-हाडे, ता. बोदवड) यांनी फिर्यादी तसेच त्यांच्या मुलांना शिवीगाळ करत मारहाण केल्याचा आरोप आहे. शेतातील दगड उचलून मारहाण करण्यात आल्याचेही तक्रारीत नमूद करण्यात आले आहे.
तसेच “जीव मारून टाकू” अशी धमकी दिल्याचाही आरोप करण्यात आला आहे. या प्रकरणी बोदवड पोलीस ठाण्यात भारतीय न्याय संहितेतील विविध कलमान्वये गुन्हा दाखल करण्यात आला असून पुढील तपास पोलीस हवालदार संदीप घरवाल करीत आहेत.
