न्हावे शिवारातील घटना; सहा जणांविरोधात गुन्हा दाखल
चाळीसगाव ( प्रतिनिधी ) – शेतातील नांगरटीच्या कारणावरून तालुक्यातील न्हावे येथे मायलेकास लाकडी दांडक्याने मारहाण केल्याची घटना घडली. या प्रकरणी चाळीसगाव ग्रामीण पोलीस ठाण्यात सहा जणांविरोधात गुन्हा दाखल करण्यात आला आहे.
शेतातील वाद विकोपाला
न्हावे शिवारातील पांडुरंग आगलावे यांच्या शेतात ट्रॅक्टरद्वारे नांगरणी सुरू होती. यावेळी सागर जगताप यांनी गटाची सरकारी मोजणी झाल्यानुसार खुणा गाडण्यात आल्या असून त्याप्रमाणे नांगरटी करण्यास सांगितले. यावरून दोन्ही बाजूंमध्ये वाद निर्माण झाला.
दांडक्याने मारहाण
वाद वाढल्यानंतर पांडुरंग आगलावे यांच्यासह इतरांनी शिवीगाळ करत सागर जगताप यांना लाकडी दांडक्याने मारहाण केल्याचा आरोप करण्यात आला आहे. दरम्यान, मुलाला वाचवण्यासाठी आलेल्या अलकाबाई जगताप यांनाही दांडका व विळ्याने मारहाण करण्यात आली. तसेच जीवे ठार मारण्याची धमकी दिल्याचे फिर्यादीत नमूद करण्यात आले आहे.
सहाजणांविरोधात गुन्हा
ही घटना २६ मे रोजी सायंकाळी सव्वापाच वाजेच्या सुमारास घडली. याप्रकरणी अलकाबाई महारू जगताप यांच्या फिर्यादीवरून पांडुरंग आगलावे, महादू आगलावे, कृष्णा आगलावे आणि अन्य तीन महिलांविरोधात चाळीसगाव ग्रामीण पोलीस ठाण्यात गुन्हा दाखल करण्यात आला आहे. पोलिसांकडून पुढील तपास सुरू आहे.
