४ दिवसांची पोलीस कोठडी
चाळीसगाव (प्रतिनिधी):- छत्रपती संभाजीनगर येथील देवगिरी नागरी सहकारी बँक लिमिटेडच्या चाळीसगाव शाखेत झालेल्या ५ कोटी ३३ लाख ८५ हजार ३५६ रुपयांच्या बहुचर्चित कर्ज फसवणूक प्रकरणात पोलिसांनी मोठी कारवाई केली आहे. शिवसेना शिंदे गटाचे नेते आणि माजी खासदार उन्मेश पाटील यांचे नातेवाईक प्रशांत वाघ यांना पोलिसांनी अटक केली आहे. त्यांना न्यायालयात हजर केले असता, न्यायालयाने ४ दिवसांची पोलीस कोठडी सुनावली आहे. या मोठ्या कारवाईमुळे चाळीसगावसह संपूर्ण जळगाव जिल्ह्याच्या राजकीय आणि सामाजिक वर्तुळात प्रचंड खळबळ उडाली आहे.
कंपनीचे कर्ज आणि एनपीए (NPA): ‘उमंग व्हाईट गोल्ड प्रायव्हेट लिमिटेड’ या कंपनीच्या नावाने देवगिरी बँकेच्या चाळीसगाव शाखेतून कोट्यवधी रुपयांचे औद्योगिक कर्ज घेण्यात आले होते. मात्र, ठरलेल्या मुदतीत या कर्जाची परतफेड न झाल्याने हे खाते थकीत (NPA) झाले.
गहाण मशिनरीची विक्री: बँकेने कर्ज वसुलीसाठी कायदेशीर प्रक्रिया सुरू केली असता, कंपनीच्या संचालकांनी बँकेकडे तारण (गहाण) ठेवलेली कोट्यवधी रुपयांची यंत्रसामग्री (मशिनरी) बँकेला कोणतीही पूर्वकल्पना न देता संगनमताने परस्पर विकून टाकल्याचे समोर आले.
बँकेची फसवणूक: या व्यवहारामुळे बँकेचे ५.३३ कोटी रुपयांचे आर्थिक नुकसान झाले. याप्रकरणी बँकेचे चाळीसगाव शाखा व्यवस्थापक जीवन राजूरकर यांनी दिलेल्या फिर्यादीवरून चाळीसगाव ग्रामीण पोलीस ठाण्यात गुन्हा दाखल करण्यात आला होता.
माजी खासदारांसह चौघांवर गुन्हे दाखल
या फसवणूक प्रकरणात पोलिसांनी नोव्हेंबर २०२५ मध्ये माजी खासदार उन्मेश पाटील, संजय धनकवडे, प्रशांत वाघ आणि प्रमोद जाधव यांच्या विरोधात फसवणूक व विश्वासघाताचा गुन्हा दाखल केला होता. या प्रकरणात माजी खासदार उन्मेश पाटील यांनी न्यायालयातून अटकपूर्व जामीन मिळवला असून, “मी या कर्जाचा केवळ जामीनदार होतो, राजकीय सूडबुद्धीने मला यात अडकवण्यात आले आहे,” असा दावा त्यांनी केला होता. यापूर्वी बँकेने त्यांच्या मालमत्तेवर जप्तीची कारवाई देखील केली आहे.
या प्रकरणाचा सखोल तपास करत असताना पोलिसांनी अखेर या कंपनीशी संबंधित आणि माजी खासदारांचे नातेवाईक असलेले आरोपी प्रशांत वाघ यांना अटक केली. न्यायालयाने त्यांना ४ दिवसांची पोलीस कोठडी दिली असून, यादरम्यान गहाण मशिनरी नेमकी कुठे आणि कोणाला विकली? तसेच या पैशांचा गैरव्यवहार कसा झाला? याचा शोध पोलीस घेत आहेत. या प्रकरणात पुढील काळात आणखी काही मोठ्या घडामोडी घडण्याची शक्यता वर्तवली जात आहे.
