म्हसावद परिसरातील घटना ; दोन अज्ञातांविरुद्ध गुन्हा
जळगाव (प्रतिनिधी):- पेट्रोल संपल्याचे सांगितल्याच्या किरकोळ कारणावरून दोन अज्ञातांनी पेट्रोल पंप कर्मचाऱ्यावर धारदार वस्तूने हल्ला केल्याची घटना एमआयडीसी परिसरात घडली. या हल्ल्यात तरुण जखमी झाला असून, एमआयडीसी पोलीस ठाण्यात अज्ञात आरोपींविरुद्ध गुन्हा दाखल करण्यात आला आहे.
तुषार भरत गुरव (वय २१, रा. इंदिरानगर, ब्राम्हण गल्ली, म्हसावद, ता. जि. जळगाव) हा तरुण म्हसावद येथील रेल्वे गेटजवळ असलेल्या नायरा कंपनीच्या एचडी पेट्रोल पंपावर काम करतो. १६ मे रोजी रात्री साडेआठ वाजेच्या सुमारास दोन अज्ञात इसम मोटारसायकलवर पेट्रोल भरण्यासाठी आले होते. मात्र पेट्रोल संपल्याने तुषार याने त्यांना पेट्रोल उपलब्ध नसल्याचे सांगितले.
याचा राग आल्याने आरोपींनी “पेट्रोल नसल्याचा बोर्ड दिसत नाही का?” अशी हुज्जत घालत शिवीगाळ सुरू केली. त्यानंतर एका आरोपीने तुषार याच्यावर धारदार वस्तूने हल्ला करून त्याच्या पोटाच्या डाव्या बाजूस वार केला. या घटनेत तुषार जखमी झाला.
या प्रकरणी एमआयडीसी पोलीस ठाण्यात भारतीय न्याय संहिता कलम ११८(१), ३५२, ३(५) अंतर्गत गुन्हा दाखल करण्यात आला असून आरोपींचा शोध सुरू आहे. पुढील तपास पोलीस कर्मचारी ईश्वर लोखंडे करीत आहेत.
