ओळख पटवण्याचे पोलिसांचे आवाहन
जळगाव (प्रतिनिधी):- शहरातील विमानतळ परिसरातील गोशाळेजवळ एक ५५ ते ६० वयोगटातील अनोळखी इसम बेशुद्ध अवस्थेत आढळला होता. त्यांना तातडीने जिल्हा रुग्णालयात दाखल केले असता, वैद्यकीय अधिकाऱ्यांनी त्यांना मृत घोषित केले. उष्माघातामुळे या वृद्धाचा मृत्यू झाल्याचा प्राथमिक अंदाज वर्तवण्यात आला असून, एमआयडीसी पोलीस ठाण्यात याप्रकरणी आकस्मिक मृत्यूची नोंद करण्यात आली आहे.
मिळालेल्या माहितीनुसार, १४ मे २०२६ रोजी सायंकाळी ४:२५ वाजेच्या सुमारास पोलीस पाटील राधेश्याम चौधरी यांना विमानतळासमोरील गोशाळेजवळ एक अनोळखी व्यक्ती पडलेली दिसून आली. त्यांनी तातडीने रुग्णवाहिकेच्या साहाय्याने संबंधिताला जळगाव जिल्हा सामान्य रुग्णालयात दाखल केले. मात्र, तीव्र उन्हाच्या झळा आणि उष्माघातामुळे उपचारापूर्वीच त्यांचा मृत्यू झाला होता.
मृत वृद्धाचे नाव आणि गाव अद्याप समजू शकलेले नाही. त्यांचे वय अंदाजे ५५ ते ६० वर्षे आहे. या घटनेची माहिती जिल्हा रुग्णालयाचे वैद्यकीय अधिकारी डॉ. अमोल पाटील यांनी दिल्यानंतर एमआयडीसी पोलिसांनी अकस्मात मृत्यू रजिस्टर क्रमांक ८०/२०२६ अन्वये नोंद केली आहे. पोलीस निरीक्षक बबन आव्हाड यांच्या मार्गदर्शनाखाली पोलीस नाईक मुकुंद पाटील या अनोळखी व्यक्तीची ओळख पटवण्याचे काम करीत आहेत. जर कोणाला या व्यक्तीबाबत माहिती असल्यास एमआयडीसी पोलीस ठाण्याशी संपर्क साधावा, असे आवाहन करण्यात आले आहे.
