कुंड येथील घटना; पोलिसांत अकस्मात मृत्यूची नोंद
जळगाव (प्रतिनिधी):- मुक्ताईनगर तालुक्यातील कुंड येथे मोटारसायकलवरून पडल्याने ७० वर्षीय महिलेचा मृत्यू झाल्याची दुर्दैवी घटना घडली. इंदुबाई संपत सोनवणे (वय ७०, रा. कुंड, ता. मुक्ताईनगर) असे मृत महिलेचे नाव आहे.
प्राथमिक माहितीनुसार, मोटारसायकलवर प्रवास करत असताना त्यांच्या साडीचा पदर वाहनाच्या चाकात अडकला. त्यामुळे त्या खाली पडून गंभीर जखमी झाल्या. त्यांना उपचारासाठी उपजिल्हा रुग्णालयात दाखल करण्यात आले होते. मात्र उपचारादरम्यान त्यांचा मृत्यू झाला.
या प्रकरणी मुक्ताईनगर पोलीस ठाण्यात अकस्मात मृत्यूची नोंद करण्यात आली असून पुढील तपास पोहेकाॅ. अजय खंडेराव करीत आहेत.
