जळगाव (प्रतिनिधी):- जामनेर शहरातील एस.टी. कॉलनी परिसरात अज्ञात चोरट्यांनी बंद घराचे कुलूप तोडून सोन्याचे दागिने व रोकड असा सुमारे ५० हजार ५०० रुपयांचा ऐवज लंपास केल्याची घटना उघडकीस आली आहे. याप्रकरणी जामनेर पोलीस ठाण्यात घरफोडीचा गुन्हा दाखल करण्यात आला आहे.
मिळालेल्या माहितीनुसार, निलेश अशोक पाळवे (वय ४०, व्यवसाय – नेट केबल ऑपरेटर, रा. एस.टी. कॉलनी, वाकी रोड, जामनेर) हे ९ मे रोजी दुपारी आपल्या कुटुंबासह घराला कुलूप लावून जळगाव येथे नातेवाईकांना भेटण्यासाठी गेले होते. दुसऱ्या दिवशी १० मे रोजी सकाळी परत आल्यानंतर घराचे कुलूप तुटलेले दिसून आले.
अज्ञात चोरट्यांनी घरात प्रवेश करून कपाटातील सोन्याचे दागिने व रोकड चोरून नेली. चोरीमध्ये ८ ग्रॅम वजनाचे मंगळसूत्र, ३ ग्रॅम वजनाचे दुसरे मंगळसूत्र, ५ ग्रॅम वजनाच्या सोन्याच्या कानातील साखळ्या तसेच २ हजार ५०० रुपयांची रोकड असा एकूण ५० हजार ५०० रुपयांचा ऐवज लंपास करण्यात आला.
या प्रकरणी जामनेर पोलीस ठाण्यात भारतीय न्याय संहिता अंतर्गत घरफोडीचा गुन्हा दाखल करण्यात आला आहे. पुढील तपास पोलीस नाईक इम्रान सय्यद करीत आहे.
