हिंगोणा येथील घटना; आरोपीविरुद्ध गुन्हा दाखल, पोलीस तपास सुरू
फैजपूर (प्रतिनिधी):- येथील जवळच असलेल्या हिंगोणा (ता. यावल) गावात मजुराला उसने पैसे दिल्याच्या कारणावरून दोन गटात वाद होऊन एका तरुणावर धारदार शस्त्राने हल्ला करण्यात आल्याची खळबळजनक घटना घडली आहे. या हल्ल्यात सुनील आनंदा इंधाटे (वय ४५, रा. आंबेडकर नगर, हिंगोणा) हे गंभीर जखमी झाले असून, त्यांच्या नाकावर जखम झाली आहे. याप्रकरणी फैजपूर पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, फिर्यादी सुनील इंधाटे यांनी केळीचे काम करणाऱ्या रवी तायडे नावाच्या मजुराला २,००० रुपये उसने दिले होते. या गोष्टीचा राग आरोपी चेतन वसंत तायडे (रा. हिंगोणा) याला आला. यावरून ५ मे २०२६ रोजी सकाळी साडेसात वाजेच्या सुमारास हिंगोणा गावातील आंबेडकर नगर भागात, फिर्यादीच्या घराबाहेर रोडवर आरोपी चेतन तायडे याने सुनील इंगळे यांना गाठले. “तू रवी तायडेला पैसे का दिले?” असे म्हणून आरोपीने इंगळे यांना शिवीगाळ करण्यास सुरुवात केली.
वादाचे रूपांतर हाणामारीत झाले. आरोपी चेतन तायडे याने सुनील इंधाटे यांना लाथाबुक्क्यांनी आणि चापट्यांनी मारहाण केली. इतकेच नव्हे तर, रागाच्या भरात आरोपीने एका धारदार शस्त्राने सुनील इंधाटे यांच्या नाकावर वार केला, ज्यामुळे त्यांना गंभीर दुखापत झाली. मारहाण करताना आरोपीने फिर्यादीला जीवे मारण्याची धमकीही दिली.
या घटनेनंतर जखमी सुनील इंधाटे यांनी फैजपूर पोलीस ठाणे गाठून फिर्याद दिली. त्यांच्या फिर्यादीवरून आरोपी चेतन वसंत तायडे याच्याविरुद्ध भारतीय न्याय संहिता (BNS) कलम ११८(१), ११५(२), ३५२ आणि ३५१(२) अन्वये गुन्हा दाखल करण्यात आला आहे.
सदर गुन्ह्याचा पुढील तपास फैजपूर पोलीस ठाण्याचे पोलीस उपनिरीक्षक मोईनुद्दीन सय्यद यांच्या मार्गदर्शनाखाली पोलीस हेकॉ/१८४२ देवेंद्र वसंत पाटील करत आहेत. आरोपीला अद्याप अटक करण्यात आलेली नाही. भरदिवसा घडलेल्या या घटनेमुळे हिंगोणा परिसरात काही काळ तणावाचे वातावरण होते.
